СПОРТ

Сонарзе-влак — ечыгорнышто

Оршанке районысо Тошто Крешын ял воктене сонарзе-влакын биатлонышт эртен.

Тудым Марий Эл Пӱртӱс поянлык, экологий да йырым-йырысе средам аралыме шотышто министерствыже, Оршанке район администраций полшымышт дене республикысе Сонарзе ден пийым кучышо-влакын обществышт эртарен.

Тыгай таҥасымашым шке жапыштыже ты обществым вуйлатыше Григорий Тихоновын тыршымыж дене эртараш тӱҥалме. Кызытат тудак чолга организатор семын кодеш. Ий гыч ийыш тушко утларак сонарзе команде ушнаш тӱҥалын. Тений Марий Эл, Татарстан, Чуваший республикла, Угарман, Киров областьла гыч чылаже 22 команде ушнен. Таҥасымаш эстафете семын эртен. Кажне команде гыч кум участник вич километрыш ече дене тоя деч посна куржталын, мишеньыш лӱйкален.

Команде-влак коклаште икымше верыш Оршанке районысо «Большая медведица» команде лектын. Кокымшо ден кумшо Марий Турек районын да Марий НПЗ-н командыже-влак лийыныт. Посна номинацийлаштат  участник-шамыч палемдалтыныт. Мутлан, «Икымше этапын эн сай куржталшыжлан» Военный-сонарзе обществе гыч Степан Виногоровым шотленыт. «Эн сайын лӱйкалыше» семын Марий Турек районысо командын еҥже Борис Попов ойыртемалтын. Тыгак эн илалше ден эн самырык участник-влакланат пӧлекым кучыктеныт. Тыгайжылан «МРООиС» команде гыч Иван Москвиным да Параньга район гыч Кирилл Колесниковым шотленыт.

Но таҥасымаш годым тыгак ончаш толшо-шамычат лум ӱмбач кошташ лӱмын келыштарыме кӱчык да лопка ечыш шогалын таҥасен кертыныт.  VIP таҥасымаште республикын пӱртӱс поянлык, экологий да йырым-йырысе средам аралыме шотышто министр Владимир Шутов, а уна-влак коклаште тудын алмаштышыже Николай Шурков сеҥышыш лектыныт. Ойыртемалтше-шамычлан сай пӧлекым кучыктеныт.

 С.Носова.

Опубликовать в Одноклассники

Добавить комментарий