Тений ече тургым моткоч кӱчык ыле. Тидлан лум шагал лиймыжат моткоч кугу амалым ыштен. Сандене ты видым йӧратыше-влак кӧ кузе кертын, туге ямдылалтыныт, таҥасымашлашке лектын, вий-куатыштым тергеныт да результатым ончыктеныт. Таче мутем Волжский районысо Пӧтъял кыдалаш школын тунемшыже-влак, изаж ден шӱжарже Юля ден Антон Тимофеевмыт нерген.
Тенийсе тургым нунылан моткоч шарнымашан лийын.
Юля 7-ше классыште тунемеш, а Антон 8-ше «б» классыште шинчымашым пога. Йоча-влак тунеммаштат, тыгак тӱрлӧ мероприятийыште усталыкыштым ончыктат, но эн тӱҥжӧ – спорт дене пеҥгыде кылым кучат. Район, республик кӱкшытыштӧ сай результатым ончыктат.
– Тений республик кӱкшытыштӧ эртыше «Надежда» таҥасымаште кок кечыжат призёр радамыш логалынам. Вара кундемна гыч лу еҥ Сыктывкарышке миенна. Стартыш 200 утла ӱдыр лектын. Мутат уке, тургыжланенам, но мыланем тиде опытым погымо семын лийын, – шарналтен ойла Юля. – Эрыкан йӧн дене куржталаш чотрак келша. Тыгак мыланем куштылго атлетике лишыл. Ечылан кумылаҥдымылан икымше тренерем Мирон Сергеевич Тимофеевлан тау. Тыгак кызыт эреак мемнан дене кыртмен пашам ыштыше Альберт Аркадьевич Семёновлан кугу тау. Тудо ке‰еж канышыжымат мемнан дене эртара. Тиде тунемме ийыште Артекыш, ГТО дене фестивальыш миенна. Тушто республикнан чапшым араленна. Шем теҥызыште йӱштылынна, экскурсийыште лийынна, кугу курыклаште коштынна. Мыланна чылажат моткоч кугу шарнымашым коден.
– Мыланемат ече дене мунчалташ келша. Ончыкшым эшеат сай результатым ончыкташ шонем, – ойла Антон. – Мемнам спортлан ача-авана кумылаҥденыт, нунак мыланна пример улыт.
– Мемнан школын тунемшыже-влак Татарстан республикыште Олимпийский чемпион Ренат Сафин лӱмеш эртаралтше таҥасымаште вийыштым тергат. Организаторжо дене палдыме лийынна, тудак ӱжеш. Ме татар, руш, марий-влак келшен илена, спорт мероприятийымат лиймек семын пырля эртарена. Туштат Юля ден Антон ойыртемалтыт. Тыге результат эшеат саемеш, вашкыл пеҥгыдемеш, шонем, – манеш Пӧтъял школышто ятыр ий физкультурым туныктышо А.Семёнов. – Президент состязанийыштат мемнан школын тунемшыже-влак икмыняр ий, республикыште икымше лийыныт, всероссийский таҥасымаште Марий Элын чапшым араленыт. 2019 ийыште команде лу эн тале коклаш логалын. Чылаже элнан 80 регионжо гыч команде-влак чумыргеныт. Молодец улыт, тыршеныт. Ирина Антонова эстафетыште пел шиповко дене финиш марте куржын. Иктышкыже йоҥылыш тошкалыныт, кудашалтын. Уке гын, эшеат сай результат лиеш ыле. Спорт – тиде спорт сандене тӱрлыжланат ямде лийман, сеҥалтынат моштыман. Чылаштлан, тыгак ача-ава-влаклан умылымыштлан кугу тау, Молодёжный политике, спорт да туризм министерствылан, район администрацийлан тау. Тек ончыкыжымат ӱдыр-рвезе-влак физкультур да спорт дене пеҥгыде кылым кучат, таза лийыт. А кызыт, коронавирусын лӱдыкшым шотыш налын, дистанционно ямдылалтыт. Кумылышт уло – йодыт. Телефон дене йыҥгыртен, кажныштлан посна заданийым пуэм.
Тек тунемше-влак пеҥгыде койыш-шоктышан, таза капкылан, нелылыкым сеҥен моштышо, тӱрлӧ ситуацийлаште йӧным мушо, илышым, шочмо элым йӧратыше да калыкын, кугезына-влакын йӱлаштым, тӱвыраштым пагалыше айдеме лийыт, сеҥымашышт дене районым, республикым чапландарат.
Е.ЭШКИНИНА.
