Советский район гыч ик пӧръеҥ пареҥгым погышо комбайныш пурен каен.
37 ияш специалист шотышто тарватыме уголовный делам Советский межрайонный следствий отдел шукерте огыл шымлен пытарен.
Тудо, кресаньык-фермер озанлыкын ончычсо инженер-механикше, профессионал обязанностьшым келшен толдымын шуктымылан кӧра еҥ колымылан титаклалтеш.
Туткар ӱмаште сентябрьыште лийын. Пареҥгым погышо комбайным ачалыме годым инженер-механик тушто аралыше авыртышым шогалтен огыл. Тиде амал дене пареҥгым ястарыме годым 31 ияш пашаеҥым комбайн кӧргышкӧ шупшылын. Пале лийын: ты пӧръеҥлан агрегат дене кузе лӱдыкшыдымын пайдаланышаш нерген каласкален огытыл.
Чот сусыргымыжлан кӧра самырык пӧръеҥ эмлымверыште колен.
Кызыт тиде уголовный делам судыш ончаш колтеныт.
Л.Камалетдинова.
