26 январьыште Йошкар-Оласе «Юбилейный» спорткомплексыште Российын Геройжо Марк Евтюхиным шарныме лӱмеш грек-рим кучедалмаш дене эртыше турнирыште Марий Элын командыже икымше верым налын.
Участник-влак латик тӱшкаште вийыштым тергеныт. Тышечын вич тӱшкаштыже сеҥышыш Волжск ола гыч самырык патыр-шамыч (Ильфат Завьялов, Алмаз Солдатов, Владислав Бырля, Илья Кириченко, Егор Семагин) лектыныт.
Организатор-шамыч «Сеҥымашыш шушаш верч» номинацийыште пӧлекым Волжск гыч Российын заслуженный тренерже А.Серяковын воспитанникше Алмаз Солдатовлан кучыктеныт. Финалыште самырык спортсмен сусырген гынат, умбакше патырлен, ончыко лектын.
Эше ик специальный пєлекым «Эн сай техник» номинацийыште 38 килограмм нелытан-влак коклаште сеҥыше Дмитрий Мамаевлан пуэныт. Моло тӱшкаштат спортсмен-влак сайын кучедалмыштым ончыктеныт, техникышт дене ойыртемалтыныт. Таҥасымаш латныл ияш марте рвезе-шамыч коклаште эртен. Тушто тыгак Киров, Москва, Озаҥ, Волжск олала гыч ятыр спортсмен вийжым терген.
Турнирын участникше, уна-влакым Марий Эл правительстве председательын икымше алмаштышыжын пашажым жаплан шуктышо А.Сальников, Марий Эл правительстве председательын алмаштышыже С.Воронцов, Молодёжный политике, спорт да туризм министр Л.Батюкова, Марк Евтюхинын шольыжо Игорь Евтюхин, тыгак кучедалмаш федерацийын вуйлатышыже А.Пиличев саламленыт.
Пӧртылын?
Тале куштылго атлет Айвика Малановам региональный командыш уэш налыныт. Шукерте огыл тудо Санкт-Петербургын чемпионатыштыже икымше верыш лектын.
Е.Эшкинина.
