СОЦИАЛ ИЛЫШ

Самырык-влакын фестивальыштлан ямдылалтыт

Марий Эл Республикысе правительстве председательын икымше алмаштышыже, тӱвыра, печать да калык-влакын пашашт шотышто министр Михаил Васютинын вуйлатымыж почеш Самырык да студент-влакын ХIХ тӱнямбал фестивальыштын региональный подготовительный комитетшын заседанийже эртен.

Тушто тиде мероприятийлан ямдылалтме нерген мутланеныт, комитетын составышкыже да фестивальыш участник-влакым ойырен налме шотышто конкурсный комиссийыш кӧм пуртышашым каҥашеныт.

Сочиште 14 гыч 22 октябрь марте  эртышаш тиде фестивальлан Марий Эл Республикын презентацийжым ямдылыме шотышто кугу паша ышталтшаш. Ола округ ден муниципальный образований-влакын администрацийлаштышт, вузлаште ӱдыр-рвезе-влакын фестивальыш делегат семын 15 апрель марте регистрироватлалташ йӧнышт улмо нерген каласкалат. Тачысе кечылан Марий Эл гыч 189 ӱдыр-рвезе ден 226 волонтер участник семын регистрироватлалтыныт. А мероприятийыш чылаже 150 эл гыч 20 тӱжем утла самырык-влак ушнат.

Фестивальыште «Культура и глобализация», «Глобальная экономика», «Экономика знаний», «Развитие общественных институтов», «Политика и международная безопасность» теме-влак ик эн тӱҥ лийыт да мутланымаш утларакше нине йодыш-влаклан пӧлеклалтеш.

Л.Камалетдинова.

Опубликовать в Одноклассники