«Звенигово районын изи тӱвыра мозаикыже» конкурс кышкарыште илышыш пуртымо проект-влак мучашлалтыныт.
Конкурсым Провой кундемын краеведений тоштерже «Иволга» палдарыме туризмым вияҥдыме рӱдерын шӱкалтышыже да «Поро ола» ола-влакым вияҥдыме поро кумыл фонд полшымо дене Геннадий ден Елена Тимченкомытын поро кумыл фондыштын оксаж дене эртарен. Конкурсын чумыр фондшо 100000 теҥге лийын.
Конкурсышто сеҥышыш лекше проект-влаклан 20 тӱжем марте теҥге дене пуэныт, да инициативный группо-влак палемдыме пашаштым шке площадкыштышт кӱлынак шуктеныт. Рашемденрак каласаш гын, Провой кундемыште «Каныш кечын тӱнӧ коштмаш» (Кокшайск селасе «МЫ» волонтёр отряд), «Келшымаш кумдык» (Суслоҥгер посёлкышто Гагарин уремысе шуко пачеран пӧртлаште илыше-влакын инициативный группышт), «Келшымаш тулото» (Суслоҥгер посёлкышто О.Тихомирова уремысе шуко пачеран пӧртлаште илыше-шамычын инициативный группышт), «Калык шарнымаште кугезе-влакын чонышт» (Звенигово оласе «Искра» инициативный группо), «Звенигово – Юл серысе ола» турист квест» (Звенигово оласе «Дружина» инициативный группо), «Звенигово ротондо воктене шыжын поэт шӱлышан семже» (Звенигово оласе «Парус» клуб шотан поэтический объединенийын инициативный группыжо), «Ялысе туризмым вияҥдымаш» (Какшамарий ялыште илыше калыкын инициативный группыжо) проект-влак илышыш пурталтыныт.
Чыла проект верысе калыкын тӱткышыжым шочмо кундемым йӧратымашке, культуржым вияҥдымашке, сообществе-шамычын тӱҥалтышыштлан полшымашке, тӱвыра ден туризм, тыгак кумдыкым тӱзатыме аланлаште палемдыме сай пашам пеҥгыдемдымашке виктаралтын.
Ӱшаныме шуэш, илышыш пуртымо чыла проект кужу ӱмыран лиеш да ий гыч ийыш вияҥеш, у йӱлашке савырна.
М.ИВАНОВА
