Майыштат посна лийына

Республикыштына у коронавирус инфекцийын шарлен кертмыж шотышто лӱдыкшӧ улмылан кӧра Марий Элыште посна улмо режимым 31 май йотке шуйымо.
Тидын дене келшышын, таче Александр Евстифеев Марий Эл Республикым вуйлатышын 17 мартыште лукмо «У коронавирус инфекцийын (COVID-19) шарлымыжлан кӧра Марий Эл Республик кумдыкышто калыклан сай санитарно-эпидемиологический йӧным ыштыме мере-влак нерген» указышкыже вашталтышым пуртен.
Кундемыштына утларак ямде режимым ыштыме документ дене келшышын, тылеч ончыч увертарыме чараклыме чыла мероприятийым 31 май йотке шуйымо. Но тыгодым шӱгарлаш кошташ чарыме пунктым кораҥдыме да тушко аралыше маске дене кошташ темлыме.
Мӧҥгӧ гыч экстренный медицине полышым налаш, пашаш каяш, тыгак 1000 м деч тораште огыл верланыше кевытыш, аптекыш, услугым пуышо объектыш миен толаш гына лекташ лиеш. Тиде дистанцийым мӧҥгысӧ янлыкым тӱгӧ лукмо годымат кучаш кӱлеш.
Тылеч посна, тачысе кече гыч тӱнӧ физкультур да спорт дене заниматлалташ, илыме вер деч 1000 м коклаште йоча дене кошташ (тыгодым икшыве ден ача але ава социальный дистанцийым кучыдеат кертыт) лиеш.
Шуко еҥ улман верлаште да тӱшка транспортлаште ончычсо семынак маске дене лийман.
Республикышкына вес регионла да йот элла гыч толшо граждан-шамыч 14 кече посна илышаш улыт.
Тӱвыра, печать да калык-влакын пашашт шотышто министерствылан, педагогике да моло пашаеҥ-шамычын чотышт ден паша радамыштым рашемден, кокла профессиональный да ешартыш образовательный программе-влакым илышыш дистанционный формо дене пурташ кӱштымӧ. Тыгак тӱвыран ведомствышкыжо пурышо тоштер шотан тӧнеж-влакым штат режимыш кусараш, тыгодым пашаеҥ ден толшо-шамычлан маске але респиратор дене пайдаланаш, икте-весе коклаште 1,5 м коклам кучаш каласыме.
Молодёжный политике, спорт да туризм министерствылан спорт тӧнеж-влакым дистанционно туныктымо формыш кусараш, спорт мастарлыклан, кӱшыл спорт мастарлыклан ямдылалтше, Россий Федерацийын да Марий Эл Республикын сборный командыштын, профессиональный спорт клубын еҥже-влаклан спорт тӧнеж-шамычым штат режимыш вончыктараш йӧным ышташ кӱштымӧ.
Промышленность, экономический вияҥмаш да торговльо министерствылан регионыштына утларак ямде улмо режим пагытыште пашам ыштен кертше организаций-влакын радамыштым кугемдыме нерген темлымашым Марий Эл правительствылан ончаш ямдылаш каласыме.