Республикын правительствыжын резерв фондшо гыч оксам школ-влакын леведышыштым олмыкташ ойырат. Тидыже Марий Элым вуйлатыше Александр Евстифеевын Морко районыш паша дене миен коштмыж годым рашемын. Тушто Кульбаш ялысе школынат леведышыжым олмыкташ кутырен келшыме.
Тиде школым ойыртемалтшын чоҥеныт. Сандене телым леведышыште лум шуко погына, а шошым шкешотан «бассейн» почылтеш. Тидлан кӧра пырдыж мучко вӱд йога, аварий лийын кертме лӱдыкшӧ лектеш. Школым ондакат кажне ийын гаяк олмыкташ логалын.
Чыла тидым школын директоржо Фарида Фахриева деч пален налмекше да зданийым ончен савырнымекше, Александр Евстифеев юватылде тыге пунчалын: Тений Морко районышто школым ыштена, молынат черетыште шогымыштым огына мондо. Эсогыл резерв фондым кучылтына, но тиде национальный школым шотыш кондена. Образований министерстве да Минстрой ончылно финансым ситараш задачым шындена. Леведышым олмыктен шуктена, каласен Марий Элым вуйлатыше.
Кульбаш школ кугу огыл, тудын ойыртемжылан туныктымо да воспитатлыме пашам национальный йӱла дене келшышын шуктен толмо шотлалтеш. Школ ден йочасад ик пӧртыштак верланеныт. Йоча-влак икымше гыч 9 класс йотке татар йылмым тунемыт. Кызыт школыш 42 йоча коштеш, класслаште икмыняр ученик веле, а икымше классыште улыжат кок ӱдыр тунемеш.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
