СОЦИАЛ ИЛЫШ

Рашемдышаш йодыш ятыр

Регионысо паша арня жапыште Светлана Солнцева ятыр вашлиймашым эртарен.

26 апрельыште депутат Курыкмарий районыш миен. Тушто ты районын Депутат-влак собраний председатель да партийный актив дене вашлийын. Тыгак еҥ-влаклан приемым эртарен. Нуно ял кумдыкым тӱзатыме, шуко шочшан еш-влаклан социальный полышым пуымо, ЖКХ, социальный объект ден корным чоҥымо, моло йодышым тарватеныт. Предприниматель-влак гын шке озанлыкыште ончен куштымо ялозанлык сатум ужалыме годым нелылык вашлиялтме нерген тургыжланен ойленыт. 

Тылеч вара Светлана Солнцева Йоласал школ коллективым Россий образований системыште лийшаш вашталтыш-влак дене палдарен.  

Вес кечынже оласе законодательный, исполнительный кучем орган-влакын представительышт ден «Единая Россия» партийын председательже Д.Медведевын регионысо общественный приемныйжын пашаеҥже-влак Сомбатхей микрорайонышто илыше-влак дене вашлиймашым эртареныт. Тушто Кугыжаныш Думын депутатше Светлана Солнцева, Йошкар-Олан мэрже Евгений Маслов, икмыняр моло лийыныт.

Вашлиймаш 28-ше номеран лицейыште эртыш. Калык актовый зал тич погынен ыле. Еҥ-влакым ЖКХ, йочасадым чоҥымо, корным тӧрлатыме, транспорт,  ятыр моло йодыш тургыжландареныт.  Шижалтын: тиде кундемыште нелылык ятыр уло. Южыж нерген толшо-влак поснак шокшешт ойлышт.

Тӱҥалтыште еҥ-влакын йодышыштлан депутат ден олан мэрже коктынат вашештышт гын, вараже Светлана Юрьевна приемым посна пӧлемыштат эртарыш.

Кугыжаныш Думын образований да науко шотышто комитетшын членже С.Солнцева «Идалыкын туныктышыжо – 2017», «Идалыкын воспитательже – 2017», «Марий йылмым эн сайын туныктышо — 2017», «Шӱмем йоча-влаклан пуэм» республиканский конкурс-влакын сеҥышыштым саламлымашке ушнен.

Л.Камалетдинова.

Опубликовать в Одноклассники