Йошкар-Оласе ракетчик-влак мастарлыкыштым эше ик гана пеҥгыдемденыт.
Кодшо кечылаште «Плесецк» космодром гыч пеҥгыде топливе дене чоҥештыше РС-24 «Ярс» межконтинентальный баллистический ракетым тергыме шот дене колтеныт. Боевой расчетышто Йошкар-Оласе ракетный дивизийын военнослужащийже-влак лийыныт.
Россий Миноборонын данныйже почеш, тергымашын тӱҥ цельже – ты классыш пурышо ракете тӱшкан ӱшанле улмыштым тергаш. «Ярсын» вуй ужашыштыже вераҥдыме ойыралтше боевой блокым Камчатке пелеотрон «Кура» полигонжын палемдыме районышкыжо шуктымо. Чылажымат сайын эртышылан шотлымо.
Ушештарена: Йошкар-Оласе дивизийыште тоштемше ракете-влакым визымше тукым «Ярс» комплекслан 2016 ийыште вашталташ тӱҥалыныт. Икымше полк-шамыч эн у техникым налын шуктеныт, терген онченыт. Но ты паша иканаште ок ышталт, молан манаш гын военнослужащий-влакым лӱмын тидлан келшышын туныктыде ок лий, эшеже полк-влакын инфраструктурыштым чотак уэмдыман. РВСН-ын чыла дивизийже у вооруженийым 2021 ийлан тӱрыс налшаш.
А.Андреев
