УВЕР ЙОГЫН

Пӱсӧ йодыш: «Понар молан ок йӱлӧ?»

Тений икымше пелийыште Йошкар-Оласе администрацийыш чылаже 3700 утла йодмаш пурен. Верысе калыкым пытартыш жапыште мо тургыжландара? 

Октябрь тылзым ончалаш гын, йодмаш-шамыч тӱн шотышто рӱдоласе корно дене кылдалтше улыт. Мутлан, еҥ-влакын ойлымышт почеш, южо корнывожышто светофор начарын пашам ышта, тыште але тушто тротуарым, тыгак общественный транспортлан остановкым ышташ кӱлмӧ шотышто йодышым тарватат. «Мемнан Советский уремысе 89-ше №-ан пӧртын кудывечыштыже кок кугу лаке уло. Тудым петыраш йодам, щебёнкат йӧра…» — возен весе.

Шыже мучаште уремыште поснак пычкемыш, сандене пытартыш кечылаште меҥгыласе электротул шотыштат мут лектеш. Мутлан, ик йодмашыште тыге воза: «Паша гыч мӧҥгӧ вараш толам. Мемнан Бауман урем гыч Анников урем велыш кайымаште понар-шамыч огыт йӱлӧ. Тротуарыштат, машина кудалыштме корныштат моткоч пычкемыш». Палемдыман, уремысе электротул, тыгак понар шотышто йодмаш-шамычын копийыштым администрацийын пашаеҥже-влак Йошкар-Оласе 1-ше №-ан ТЭЦ-ыш колтат.

Калыкым корно веле огыл, моло йодышат тургыжландара. Мутлан, отставкыште майор А.Вязовов теве мом воза: «Россий Армий Тӱвыра пӧрт — Йошкар-Оласе Дубки микрорайонышто илыше калыкын рӱдыжӧ. Но зданийын тӱжвал тӱсшым ончалметат ок шу, сандене тудым олмыкташ полшаш йодына.»
Кажне йодмашым администраций пашаеҥ-влак ончен лектыт да ситыдымашым тӧрлымӧ шотышто вашмутым пуат.

Г.Кожевникова

Опубликовать в Одноклассники

Добавить комментарий