Рушарнян Марий Турек поселкысо ик пӧрт подъездыште гранатан сумка киен. Тидын нерген увер МВД-н дежурный частьше гыч Росгвардий отделыш пурен. Тылеч вара тушто илыше-влакым моткоч писын уремыш лӱдыкшыдымӧ верыш луктыныт.
Росгвардий отделын ОМОН-жын инженерно-технический группыжын специалистше-влак тиде сумкаште мо улмым тергеныт. Тушто чынже денак гранате киен. Чынрак каласаш гын, Ф-1 гранатын корпусшо. Пиалеш, кӧргыжӧ яра лийын.
Сумкаште тыгак военный билет, паспорт да икмыняр арвер лийын. Тидак озажын кӧ улмыжым рашемдаш полшен. 35 ияш пӧръеҥ ты пӧртышкӧ палымыже-влак деке толын улмаш да сумкажым подъездыште монден коден.
Тиде факт шотышто тергымаш кая.
Л.Камалетдинова.