Кодшо арнян Марий Эл Республикын социальный вияҥмаш министрже Ольга Фёдорова ден Айдемын праваж шотышто уполномоченный Лариса Яковлева Советский районышто верланыше Кундыштӱр психоневрологический интернатыш миен коштыныт.
Тушто нуно тӧнежын пашаеҥже, социальный услуго-влакым налше-шамыч дене мутланеныт, пӧлемлам онченыт, тӱрлӧ кружок ден клубын пашаштым акленыт, интернатын 60 ияш юбилейжылан пӧлеклалтше историй музейыш пуреныт.
Таче тӧнежыште эртарыме социальный реабилитацийыш социально-медицинский, социально-педагогический, социокультурный да тазаҥдыме физкультур паша-влак пурат. Интернатыште тыгак усталык арт-студий, 10 утла тӱрлӧ кружок пашам ышта. Тыште илыше-шамыч спорт мероприятийлашке – волейбол секцийыш, «Таза илыш-йӱла школыш» – коштыт. Уремысе тренажёр да инвентарь дене шыҥдарыме у спорт площадкат яра ок шинче, йӱдлан веле ярса.
Интернатын пашаеҥже-влак социальный услуго-влак дене пайдаланыше-шамычын илышыштым саемдаш, усталыкыштым вияҥдаш чыла ыштат.
М.ИВАНОВА.
Фотом Марий Эл Республикын Социальный вияҥмаш министерствыжын сайтше гыч налме.
