ЕШ ДА ИКШЫВЕ

Пырля лияш йӧн лектын…

Коронавируслан кӧра еш дене пырля жапым пайдалын эртараш сай йӧн лектын. Уремыш лектын кошташ улшо чарак изиш кумылым волта гынат, тачысе илыш условийыште мом гына ышташ ок лий!!! Тидын шотыштак Психолого-педагогический, медицине да социальный полышым пуышо «Детство» рӱдерын специалистше-шамычат ача-ава-шамычлан икмыняр каҥашым пуат.

 Тиде кечылаште шкем сайын шижаш манын, молгунамсе кече режимым эскераш темлалтеш. Тыгак пашаш але школыш коштмо кече семынак эрдене кынелаш, кастене малаш возаш. Ешын кече распорядкыже почеш кугужат, изижат шке ыштышаш пашаштым шуктышашак улыт. Вара чылан пырля еш, сурт сомылкам шуктен кертыт, мутлан, пачерым эрыкташ, кочкаш шолташ…

Пырля канышланат жапым ойырыман. А тыште ешыште кажныже мом ышташ йӧратымым шотыш налман. Тиде ӱстембал модышат, викторинат, кидпашат, моло оҥаят лийын кертыт. Ончыч тыге жапым пырля эртарен огыдал гын, кызыт тидлан эн сай тат.

Ты пагытыште икшыве-шамычлан Инернетыште шинчылташат чарыман огыл, вет тӱрлӧ социальный сеть гоч нуно кылым кучат. Но тидлан мыняр жапым ойырымым ончылгоч палемдаш кӱлеш.

 Южо икшыве кызыт лийше событий-влак деч лӱдынат кертеш. Сандене ача-ава-шамчылан нунын деке тӱткырак лийман, вирус дене кылдалтше  эпидемий нерген чын уверым пуыман. Икшывым лӱдыкташ огыл манын, тӱнясе, элысе ситуаций нерген палдарыман, чер кузе шарлыме да тудын деч аралалтме нерген икшыве палышаш.

 Мутат уке, кужу жап пырля эре ик условийыште лийме деч нояшат лиеш. Сандене икте-весе деке ешыште тӱткӧ лийман. Йочан сырымыжым шижын моштыман да утыжым «витарыман» огыл.  Йолташ, кова-коча-влак декат йыҥгырташ лиеш. Кӧн мом ыштымыже шотышто сай шонымашым ешланат кӱсынлаш келшен толеш. Еш, йолташ-влак коклаште онлайн-кыл гоч таҥасымашымат эртараш йӧн лектеш. Кугурк ийготан родо-тукымда нергенат мондыман огыл.  

А икшыве-влак дене кылым ыштыме шотышто йодыш лектеш гын, рӱдерын специалистше-влак тыланда  8917714825 номеран телефон але скайп гоч полшен кертыт.

С.НОСОВА

Опубликовать в Одноклассники

Добавить комментарий