Таче, 23 сентябрьыште, Россий Президент Владимир Путин видеоконференций йӧн дене Марий Эл вуйлатыше Александр Евстифеев дене вашлиймашым эртарен.
Тушто нуно ик эн пӱсӧ кок йодышым каҥашеныт – тиде коронавирус дене республикыште улшо сӱрет да нацпроект-влак дене паша.
Марий Эл вуйлатыше икымшыж нерген президентлан радамлын каласкален. Тудо ойлен:
– Пагалыме Владимир Владимирович, пандемий дене кучедалмаште полышым да окса полышым пуымыланда таум ыштена. Идалыкат пеле жапыште федеральный рӱдер гыч республикыш 2,5 миллиард теҥге пурен.
Вараже Александр Евстифеев Марий Элыште социально-экономический ситуаций сай семын аклалтеш манын палемден. Тыгак промышленный, ялозанлык производство кушмо, рӱдолаште автовокзал, Козьмодемьянскыште эҥер порт, аэропорт терминал чоҥалтме нерген ойлен. «Лӱдыкшыдымӧ да сай качестван корно» нацпроект дене келшышын кум ий жапыште паша кузе шукталме дене палдарен. Йочасадлам, школлам, перинатальный рӱдерым чоҥымо, икмыняр моло нерген каласкален да Россий Президентлан Марий Эл Республик, тушто илыше-влак нерген азапланымыжлан тауштен.
Владимир Путин тыге каласен:
– Александр Александрович, тендан дене республикыште чынже денак ситуаций сай велыш вашталтеш. Тӱҥ направлений-влак денат показательда сай. Тыгодым аварийный илыме вер фонд эше кугуак кодеш.
Умбакыже Президент ты шотышто элын правительствыжын могай решенийым лукмыжо, ЖКХ-ам, корно сетьым вияҥдыме могай программе-влак улмо, мыняр окса ойыралтме нерген ойлен да тушко логалаш, пашам умбакыжат жапыштыже шукташ кӱлмӧ шотышто темлыме семын каласен.
Л.Камалетдинова
