Марий Турек районысо Карлыган ялыште чылт марла йоҥгышо «Пеледыш» лӱман кевыт уло. Тудын верланыме оралтыштыжак, воктеныже, мини-бар пашам ышта.
Чыла тидым тыштак илыше Кочергинмыт еш почыныт. Чынракше, озашт — Ольга Кочергина. Шочынжо тудо Арбор кундемысе Толтенур ял гыч. Карлыганыш марлан толын. Мо оҥайже, ончыкылык пелашыж дене нуно ик классыште тунемыныт гынат, ӱдырын Йошкар-Оласе медколледжыште, а Валерийын «Юлтехыште» кокымшо курсышто шинчымашым погымышт годым веле келшаш тӱҥалыныт, вара ушненыт. Кызыт вате-марийын кок шочшышт кушкеш.
Специальностьшо дене Ольга – лабораторный техник. Тунем пытарымекше, Йошкар-Олаште тиде пашам ыштенат шуктен, вет Кочергинмыт рӱдолаште еҥ пачерым айлен иленыт. А прописке деч посна икшывыштлан йочасадыште верым ойырен огытыл. Тыге кок эргыштым Карлыганысе садикыш колташышт логалын. Иктыже кызыт вич ияш, весыже июльышто кок ийым тема.
Нунын пелен лияш манын, самырык ава пелашыжын мӧҥгышкыжӧ илаш толын. Марийже Йошкар-Олаштак пашам ышташ кодын. Тыгодым кажне арня мучаште мӧҥгышкыжӧ толаш да каныш кечылажым ешыж дене пырля эртараш тырша.
Шке пашам тӱҥалаш шонымашышт кузе шочмо нерген йодмеке, Ольга тыге каласкалаш тӱҥале:
— Пелашемын шке пашам тӱҥалаш шонымашыже шукертак ыле да тидлан кумылжат лийын. Мый тудлан тӱрыс ӱшанем. Санденак чылажымат утыжым кугу лӱдмаш деч посна ыштыме. Эн ончычак кевытым почна. Чынрак каласаш гын, тиде оралте лийын. Ме тудым 2017 ийыште налынна да шканна кӱлмӧ семын олмыкташ, оборудованийым вераҥдылаш тӱҥалынна. Икымше гана кевытна налше-влаклан шке омсажым июль кыдалне почо.
А вет тунам вате ден марийлан улыжат 25 ий лийын. Тыгай ийготышто шке пашам тӱҥалаш чылаштынак огыл чолгалыкышт сита. А Кочергинмытын, тевыс, ситен.
— Йошкар-Оласе йочасадыште эргына-шамычлан верым ойырат гын, ала кызытат туштак илена да пашам ыштена ыле, — умбакыже мутшым шуйыш самырык амалкалче. — Но ялыш толынам гын, могай-гынат пашам ышташ кӱлын. Тышке илаш куснымо деч ончычак тиде оралтым ужалыме нерген увертарымашым ужынна ыле. А илаш толмеке, пелашем «ала тудым ме налына?» манын темлыш. Эше изиш ешараш гын, тиде оксаж дене олаште пачерым налаш лиеш ыле. Но тыге пӱрен улмаш, очыни. Кызыт гын ялыште илаш сайракла чучеш.
Ольган ик эн тӱҥ эҥертышыже — пелашыжын аваже, ава лийшыже. Ончыч тудо банкыште ыштен, сандене ревизийым эртараш, бухгалтерий дене кылдалтше моло пашам шукташ полша.
— Кевытчына-влак моткочак кумылзак улыт. Поставщик-шамычлан кажне гана заявкым пуыман, вара сатум приниматлыман, молат. Паша ситышын логалеш, но нуно ик ганат вуйым огыт шупш, — палдарыш Ольга.
Тиде оралтыште Кочергинмыт шукыжым вес семын ыштеныт. Кевытым эшеат шуен, ончыкыжым кочегаркым чоҥынешт. Складымат кумдаҥдаш шонат. Улшыштыжо кӱварым вашталтынешт.
— Мини-барыште эше ик пӧлемым шотыш конден шукташ кӱлеш. Икманаш, шонымаш ятыр, сомыл – эшеат шукырак. Санденак ыштен налме оксам кызытеш шке кӱлешлан тунар огына кучылт. Парышын кугурак ужашыжым уэш пашашкак колтена, — рашемдыш амалкалче.
Карлыганыште кевыт икмыняре уло гынат, верысе калык «Пеледышыш» кумылын коштеш, вет тушто кочкыш йӧрвар веле огыл, мо кӱлеш, чыла гаяк уло. А мо уке гын, еҥ-влак йодмашым пуат.
«Мини-бар» манмым колмеке, ушышто изи-и гына бар сӱретлалтеш, туге? А чынже дене йӧршынат тыге огыл. Барын тӱҥ пӧлемышкыже шуко еҥ шыҥа. Адакшым шке тӱшка дене, моло-влак деч петыралтын, посна шинчаш келыштарыме изирак пӧлем уло. Санденак самырык-шамычат жапыштым тыште эртараш йӧратат. Поснак каныш ден пайрем кечылаште шукын погынат. Кугыеҥ-влакат шочмо кечыштлан, юбилейлан, сӱанлан иквереш чумыргат, эсогыл каслан тудым айлат. Тыгай йодмашым ончылгоч пуышо-влак шагалын огытыл.
Ме, пӧлемлашке пурен лектын, мини-барым ончен савырнышна. Чыла вере ару. Кеч-можымат жаплан келшышын ыштыме шижалтеш да коеш. Сандене тыгай верышке угыч да угыч толын, йолташ-шамыч дене пырля каналтен шинчымет кузе огеш шу?!
Любовь Камалетдинова.
Авторын фотожо.
