Тенийысе эпидсезонышто Марий Элыште 1374 еҥ регионысо медицине организацийлашке пудий пурлмылан вуйым шийын миен, тидыже ӱмашсе тыгаяк жап дене таҥастарымаште 6,5 процентлан шагалрак. Пудий республикнан чыла кундемыштыже, поснак чодыраште, ялыште, сад-пакчаште, шӱгарлаште, паркыште озаланен.
Тымарте вирусан пудий энцефалит дене Кужэҥер район гыч 1 кугыеҥ черланен. Килемар, Медведево, Советский, Шернур, Оршанке районлаште да республик деч ӧрдыжтӧ пудий-влак 13 еҥлан боррелиозым «пӧлекленыт».
Специалист-влакын палемдымышт почеш, август гыч йӱштӧ пагыт толмо марте республикнан юлсер кундемлаштыже пудийын кокымшо видше чолган озалана. Тиде жапыште пудий пурлмо случай утларакше Волжский, Курыкмарий, Килемар да Звенигово районлаште регистрироватлалтеш. Тидымак шотыш налын, поснак нине кундемыште илыше калыклан пудий пурен кертме деч аралалташ темлалтеш.
Капкыл гыч лукмо пудийым Марий Элын Гигиене да эпидемиологий рӱдерыштыже (Йошкар-Ола, Машиностроитель урем, 121-ше пӧрт, телефон: 73-06-72) кажне кечын тергат.
Роспотребнадзорын Марий Элысе виктемже медицине организацийлаште вирусан пудий энцефалит деч иммунизацийлан вакцине, пудий пурлман пациент-влаклан экстренный профилактикым эртарашлан иммуноглобулин улмым, тыгак калыкым иммунизироватлыме, акарицидный обработкым ыштыме пашам эскеренак шога. Таче кечылан регионысо медицине организацийлаште иммунобиологический препарат ситышын уло. 2 сентябрь йотке 1349 еҥлан прививкым ыштыме, 738 гектар кумдыкышто акарицидный обработкым эртарыме.
М.ИВАНОВА
