Провой кундемыште кажне ийын «Зарница-Поволжья» военно-спортивный модмаш эрта. Теният тудо апрель мучаште Звенигово оласе «Водник» стадионышто лийын.
Мероприятийыш районысо тӱрлӧ школ гыч 9 команде чумырген. Нунын коклаште Кужмарий кыдалаш школысо юнармеец-влакын сборныйжо (вуйлатышыже Т.Семёнова) вийжым терген.
Участник-шамыч пневматический винтовко гыч лӱйылтыныт, турникыште шкем нӧлтеныт, 60 метрым писын куржын эртеныт, автоматым рончен погеныт, историй дене кылдалтше «Ратные страницы истории» викториныште уш-акылыштым пудыратылыныт, строй дене рыҥ ошкылмаште таҥасеныт.
Зарницын тӱҥжылан тактический ужашым писын эртымаш шотлалтын. Моткоч кӱчык жапыште противогазым чияш, автомат дене «минан участкым» эрташ, команде денак наступленийыш лекташ да «сусыр-влаклан» медицине полышым чын пуаш кӱлын. Варажым марш-бросок дене финишыш чымалтман улмаш.
Чыла нелылыкым эртымек, Кужмарий кыдалаш школын командыже икымше верыш, Звенигово лицейын сборныйжо кокымшыш, Шолэҥер кыдалаш школын командыже кумшо верыш лектыныт.
Кужмарий кыдалаш школын командыже (тидлан «Алмаз» военно-патриотический клубын да Кужмарий «Шурави» военно-патриотический клубын вуйлатышыже А.Щербаковын пашамат палемдыман) районын чапшым республик кӱкшытыштӧ аралаш тӱҥалеш.
Е.Эшкинина.
