Мый шуко пачеран пӧртышто илем. Пошкудем чӱчкыдынак тамакым шупшеш да пушыжо окна гыч пачерышкат пура. Тидын шотыштак рашемдынем: тудо тамакым ынже шупш манын, закон почеш иктаж-могай чарак уло мо?
Е.Воронцов
Йошкар-Ола.
Йодышлан Медведево районысо прокурорын кугурак полышкалышыже С. Г. Белова вашештен:
— Пошкудо тамакым шупшеш гын, южым локтылмо дене моральный эҥгекым ыштымылан тудым мут кучаш шогалташ лиеш. «Граждан-влакын тазалыкыштым йырым-йырысе тамак шикш да тамакым шупшмо последствий деч аралыме нерген» федеральный закон (23.02.2013) дене келшышын, граждан-влак ты шотышто законын йодмыжым шуктышаш улыт. Тушто ончыкталтын: шуко пачеран пӧртыштӧ, тыгак лифтыште да тӱшкан пайдаланыме пӧлемлаште тамакым шупшаш ок лий. А шупшшо-влакым Административный кодекс дене келшышын мут кучаш шогалтат. Штрафын кугытшо 500 гыч ик тӱжем теҥге марте лийын кертеш. Протоколым полиций пашаеҥ-влак возышаш улыт.
РФ Верховный Судын пунчаже почеш (26.12.2018), тамакым шупшшдымо еҥ-влак тамакым шупшшо пошкудо-влак деч южым локтылмо дене моральный эҥгекым ыштымыштлан компенсацийым кӱрын луктын кертыт. Сандене те пошкудыда деч компенсацийым йодын кертыда. Тидын шотышто ответчикын илыме верысе судыш йодмаш дене лекман.
С.Носова ямдылен