Марий Элын Молодёжный политике, спорт да туризм министерствыж ден «Волонтёр-медик-влак» всероссийский молодёжный толкынын регионысо пӧлкаже «СТОП ВИЧ/СПИД» акцийлан пӧлеклалтше «Почешем курж» куржталмашым эртареныт.
Тиде мероприятий самырык-влакым шке тазалыкым аклаш да перегаш туныктымашке, ВИЧ-инфекций деч аралалтме йӧн-шамыч дене палдарымашке виктаралтын.
Тӱҥ шотышто республикын вузлаштыже тунемше-влак куржталыныт. Волонтёр-медик-влак ВИЧ/СПИД нерген радамын палдарыше палаткылаште пашам ыштеныт, ВИЧ-инфекций йодыш шотышто анкетированийым эртареныт, шучко чер деч аралалтме, черланымым шижмеке, кушто тергалташ, умбакыже кузе илаш кӱлмӧ нерген памятке-шамычым пуэденыт. А СПИД-рӱдерын пашаеҥже-влак ВИЧ-лан яра тестироватленыт да студент-влакын йодышыштлан вашештеныт.
М.ИВАНОВА