УВЕР ЙОГЫН

Порылык таман шокшо кочкыш…

Илышыште кеч-мо лиеш гынат, порылык, икте-весым чаманымаш, йӧратымаш эрелан курымашлык чон-шижмаш поянлык семын кодыт. Лач нуно кажне айдемылан да тӱшка калыклан неле годым илен лекташ полшат. Таче илышна икшырымын, юмылан тау, сар деч посна эрта. Туге гынат  тӱрлӧ амаллан кӧра нужнан, шкетын илыше, пачер деч посна кодшо, суртддымо- печыдыме-влак уке огытыл. Шонымаш де пӱрымаш эреж годымак ик семын келшен огыт тол. Сандене ойгыш логалше-влаклан полыш кидым шуялтыманак. Весым умылен моштышо еҥ-влак коклаштынат улыт. Поро кумылым ончыктымо «Пища жизни» фондын еҥже-влак нерген мутым лукнем.

Нуно жапын-жапын марий рӱдолан луклаштыже шокшо кочкышым пуэдат. Мутлан, 2, 9,16,23,29  мартыште Чавайн бульварыште да Панфилов уремыште лийыныт. Кажне шуматкечын, эр эрденак, эре ик жапыште нуно тушто шогеныт. Шыдаҥ да шемшыдаҥ шураш гыч пучымышым, пурса шӱрым темленыт. Киндымат пуэденыт. Тӱрлӧ шудо гыч чайым йӱктеныт. А чай дене подылаш  лачка кочкышыштат лийын.

Икымше гана кочкышым пуэдыме сӱретым ужмо мыйым чотак ӧрыктарен.  Очыни, мыйым веле огыл. А тыгай «кочкыш полышым» вучышыжо да налаш ямде улшыжо уке огытыл улмаш. Поро кумылым ончыктышо фондын еҥже-влакын ойлымышт почеш, южгунамже 12 литр пурыман котелокышто ямдылыме пучымыш чылаштлан ситен огыл. Вет кажне гана 25-30 еҥ наре кочкышлан толеш. Южышт 2, 3, 5 порций денат налын каят. Йӱштыштӧ кочкаш огыл манын, пеленышт налын кайыше-шамычат улыт. Санденак волонтер-влак эше ик котелокым налаш шонат. 

«Пища жизни» фонд Российыште 1988 ийыште, Арменийыште мланде чытырналтме деч вара, шочын. Тунам тудо тушто ойгыш логалше еҥ-влаклан полшымо амал дене ышталтын гын, варажым фонд Российысе моло олаламат авалтен. Йошкар-Олаштат тудо ынде лу ий наре пашам ышта. Тушко ушнышо-влакым волонтер семын ончыктыман, очыни. Шке тӱҥ пашашт деч посна, яра жапым, йӧным муын, шокшо кочкышым ямдылат, да вара пырля погынен, палемдыме жапыште ик верыш лектыт. Ик тыгай чолга еҥ Людмила Суворова дене мутым вашталтышна. Тудо  ты фондышто пашам ышташ тӱҥалме жапше гычак. Организацийжымат илыме пачер адрес денак  регистрироватленыт. Пелашыже тыгак организацийын ик эн чолга еҥже.   Людмилан ойлымыж почеш, кочкышым пуэдыме пашам тӱҥалмеке, нуным шылталыше, шудалше-шамычат лийыныт. Вет чыланжак огыл сурт-пече деч посна кодшо-шамычым умылаш да чаманаш ямде улыт. Нуным ола гыч поктен колташ темлыше-шамычат лийыныт. Но кызыт еҥ-влак порырак лийыныт, манеш тудо. Эшежым шокшо кочкышлан суртддымо-печыдыме-влак веле огыл, шкет илыше кувавай ден кочай-влакат коштыт. Чынжымак, волонтер-влакын ойлымышт семынак лектеш: тиде фондын суапле пашаже шокшо кочкышым пуэдымаште веле огыл. Пучымыш тарелка да чай стакан дене пырля ойган еҥ-влак чаманымашымат шижыт. Весылан полшен, волонтер-шамыч шке манмыштла,  йырым-йыр улшо еҥ-влакын илыш умылымаштымат мыняр-гынат сай велке вашталтат.

А кӧ ты фондын пашашкыже ушнаш шона, координатыштым социальный сетьыште муын кертеш. Поснак кочкыш сату дене полышым пуэн кертше-влакым нуно эре вучат. Мутлан, тӱрлӧ шӱрашым, ложашым, сакырым, кушкыл уйым, пакчасаскам, чай шудым, кылмыктыме емыжым, фруктым намиен кертыда. Тыгак ик гана кучылтлтше  атышӧр  эре кӱлеш. Шийвундо надыр дене полшаш шонышо-шамычымат вучат.

С.Носова

 

Опубликовать в Одноклассники

Добавить комментарий