ТАЧЕ ЯЛЫШТЕ

Полыш уло – чоҥен шуктат

Волжский районысо Сотнур селаште верланыше черкылан тений 206 ий темын. Кызыт тудын пелен воскресный школ ден трапезым чоҥат. 

Тышке толмына годым пӧръеҥ-влак тушто лачак пашам ыштат ыле: икте ошмам кольмо дене кӱлеш верыш нумалын, весе куштырам кораҥдылын…

Воскресный школ лийшаш оралтыжымат, трапезжымат леведыш йымаке пуртеныт. Оралте кӧргыштат паша «шолын». Чоҥаш кӱлшӧ  материалым тушкак нумал оптеныт. Теве кондымо окнам нумалын, тыманмеш кӱлеш верыш поген шогалтышт.

– Паша тыште але пеш шуко. Полшышо-влакат улыт. Теве окнам верысе депутат Сергей Фёдоров конден. Витле килограмм нелытан 33 мешак цементымат тудак колтен. Эше Станислав Смирнов конден. Йошкар кермычым Марий Эл Конституционный судын судьяже Валериан Александрович Егоров йолташем налын пуэн. Чапле качестван кум тӱжем кудшӱдӧ кермыч – воскресный школым чоҥаш пеш кугу пӧлек.  Трапезлан Корамас кундемын чолга еҥже Сергей Мамасов пурам пел акеш пуыш. Моткоч кугу тау чылаштлан, – куанжым ок шылте ончычсо  туныктышо, верысе чолга еҥ А.Сапаев. – Прихожан-влакынат полышышт уло, верысе калыкат кумылын ушна. Адакшым шке кӱсен гычат шийвундым луктын пышташ логалеш. А чон йӱла, тӱҥалме пашам мучаш марте лийже манынак шуктыман.

Черке деч мӱндырнак огыл, курыкым волымаште, йӱштылмӧ вер уло. Тушкат калык эреак коштеш. А вӱдын температуржо тушто телымат, кеҥежымат икгай. Улнырак памаш вӱд шыргыктен йога. Тушко ял калык вургемым шӱалташат толеш. «Яндаррак, свежарак лиеш», – маныт. Тыглай йӱашат тышеч тӱрлӧ кугытан атеш темен каят. «Илыше вӱд» чылалан да чыла шотыштат пайдале.

Е.Эшкинина.
М.Иванован фотожо.

Опубликовать в Одноклассники

Добавить комментарий