16-19 мартыште Калугышто полиатлон дене Российын чемпионатше (кеҥеж четырёхборье) эртен. Тушеч Марий кугыжаныш университетын командыже кумшо вер дене пӧртылын.
Вийым тергаш самырык-влаклан соперник-шамычын талын ямдылалтмыштат чаракым ыштен огыл. Мутлан, абсолютный зачётышто пӧръеҥ-влак коклаште МарГУ-н студентше, элнан сборный командын членже Александр Рублев кумшо верым сеҥен налын. 21-23 ияш-влак коклаште тудак икымше лийын. 18-20 ияш-влак тӱшкаште Мария Петухова ончыко лектын, Российын спорт мастерже нормативым шуктен. 21-23 ияш ӱдыр-шамыч тӱшкаште Вера Минина кумшо верыш лектын. Вера, тыгак эше ПГТУ гыч Дарья Зайцева спорт мастер нормативым шуктеныт.
Участник-влак лӱйылтмаште, иймаште, кӱчык да кужу кутышыш куржмаште вийыштым тергеныт, сай результатым ончыктеныт. Такшым МарГУ-што йӱла почеш, манашат келшен толеш, кеҥеж полиатлон сайын вияҥеш. Тыште СССР, Росссий да тӱнямбал кӱкшытан спорт мастер-влакым ямдыленыт.
Тиде чемпионатыште Марий Эл сборныйын соперникше Моско, Санкт-Петербург олала, Краснодар край, Томск, Ярославский, Белгород, Тамбов областьла гыч лийыныт. Икымше верыш Калуга областьын, кокымшыш Краснодар крайын командышт лектыныт.
Е.Эшкинина.
