Шошо призыв
Поезд, корно, плац, сержант-влак, формо…
Шога салтак: ремень кеча,
Сур упш онча кава пундашыш…
1 апрель гыч 15 июль марте элна мучко шошо призыв эрта.
Салтак радамыш тиде тургымышто 700 (18 гыч 27 ияш марте) марий рвезе шогалшаш. Шукынжо Рӱдӧ ден Эрвел, икмыняр процентше Кечывалвел да Касвел округлашке логалшаш улыт. Шукыштым тўҥ шотышто сухопутный войскаш колтат.
– Вашталтыш кугужак огыл, но уло. Мутлан, кӱшыл шинчымаш нерген дипломан рекрут тыглай салтак семын латкок тылзылан стройыш шогалеш але кок ийлан контрактник лияш – шке ойырен налеш. Тыгак лишыл кечылаште законышто вашталтыш лийшаш: професиональный училищым але колледжым тунем лекшыланат ик ий срочный службым эрташ але кок ийым контракт почеш – ойырен налаш йӧн пуалтеш, – мане пресс-конференцийыште Марий Эл Республикын военный комиссарже С.Сидоркин. – Национальный гвардийыште служитлышылан отсрочкым пуат. Кажне призывниклан персональный электронный картым почыт. Тудым ончыч эксперимент семын Москошто ямдыленыт гын, кызыт илышыш кўкшӧ технологий шыҥдаралтмылан кӧра тидым республик кўкшытан сборный пунктыштак ыштат. Тушто салтак нерген 300 увер (параметр) лиеш. Салтакым служба верыш наҥгайыме годым ача-ават пырля ужаташ каен кертыт.
Такшым призыв шке радамже дене эрта. Салтак илышым «тамлышылан» вузыш пураш куштылгырак лиеш. Тидлан частьын командирже подготовительный курсыш тунемаш пураш темлымашан характеристикым возен пуышаш.
Палаш уто огыл: таче кечылан республикыштына чылаже латкок еҥ альтернативный службым эрташ (2003 ий гыч чылаже 49 еҥ) ямдылалтеш. Тўҥ шотышто нуным эмлымверлаш, почтыш пашам ышташ колтат. Тыгай службыш логалаш айдемын могай верам кучымыжым, тўняончалтышыжым шотыш налыт. Нунылан ончылгоч (пел ий ончыч) йодмашым возаш кўлеш. Мутлан, службым шыжым эртышаш гын, йодмашым шошым пуыман. Тыгайже тиде шошо тургымлан – кум еҥ.
Уш-акылым пўсемдаш, патриотизм шўлышеш кушташ образовательный учрежденийлаште лўмын тўрлӧ программе ышталтеш, военный подготовко дене тўрлӧ мероприятий, таҥасымаш эртаралтыт. Тек кажне рвезе порысшым лийже манын шукта, элнан ўшанле эргыже лиеш!
Военный билетыште рвезе военный службым эртен але уке нерген возалтшаш. Армийыште служитлыдыме рвезылан справкым гына кучыктат. Салтакыш миен толшылан кугыжаныш службышто, муниципальный учрежденийлаште пашам ышташ йӧн пуалтеш, а службым эртыдыме еҥ ты сферыште пашам ыштен огеш керт.
Е.Эшкинина.
Снимкыште: у вургем моткоч йӧнан.
