Российысе марий калыкын I погынжо.
Ӱпо губерний Пӱрӧ ола (Бирск). 1917 ий 15-25 июль.
178 делегат лийын. Погыным П.П.Глезденёв вӱден,
шкеныштым Л.Я.Мендияров, В.М.Васильев,
П.М.Кунаев, М.Н.Янтемир да икмыняр молат чолган ончыктеныт.
Погынысо пунчал гыч марий калыкым вияҥден
колтымо дене кылдалтше тӱҥ шонымаш-влак:
— Марий-влакын шукын илыме верлаште вуйлатыме
органлаште вуйлатыше-влак марий лийшаш, марий огыл гын,
йылмым садак палышаш улыт;
— мланде тӱшка калыкын поянлыкше лийшаш;
— кооператив-влакын пашаштым вияҥден колташ полшаш;
— тунемаш шонышо-влаклан учительский семинарий-влакым
почаш, тушто пӧръен дене пырля ӱдырамаш-влакат
тунем кертышт;
— национальный школ-влакым почаш тӱҥалаш;
— марий-влакын рӱдӧ духовный управленийжым ышташ;
— Россий мучко марий-влакын организацийыштым ышташ
тӱҥалаш;
— кугарня марий-влакын жаплыме кечыж семын кодшаш.
— «Ӱжара» газетым лукташ тӱҥалаш.
II Марий калык погын. Озаҥ ола.
1918 ий 6-14 июнь (лу кече наре шуйнен).
Погыным Л.Я.Мендияров вӱден. Погынын пашаштыже
чолгалыкым ончыктышо еҥ-влак: В.А.Мухин, Н.В.Никольский,
Д.И.Адаев, Н.М.Орлов, М.И.Веткин, А.Ф.Конаков, С.А.Черняков,
И.Е.Романов. Тӱҥ шотышто Совет власть да тудын ваштареш
шогымо дене кылдалтше йодыш-влакым каҥашеныт.
III Марий калык погын.
Йошкар-Ола.1992 ий 30-31 октябрь.
Чылаже 443 делегат, уна лийыныт. «Марий ушем» мер организацийын
тыршымыж дене эртарыме. Тудым Марий национальный
драме театрын тӱҥ режиссёржо В.А.Пектеев
вуйлатен. Марий погын-влак кокласе пагытыште пашам шуктышашлан
Мер Каҥаш ышталтын. Оньыжалан В.А.Пектеевым
сайленыт. Марий погын марий калыкнан кӱшыл представительный
органже семын палемдалтын.
IV Марий калык погын. 1996 ий 18-19 октябрь.
Икымше кечын погынымашым республикын Кугыжаныш секретарьже
А.А.Максимов вӱден. Саламлаш икымше марий
президент В.М.Зотин толын. Погын марий калыкын умбакыже
вияҥме корныжым палемден, кугыжаныш йылме-влак шотышто йодыш
рашемдалтын.
V Марий калык погын.
Йошкар-Ола, 2000 ий 9-10 июнь.
«Марий калык да власть кучем» теме йыр мутланымаш
каен. Погын республикысе правительстве кӱкшыт гыч
виктарыме йогын дене эртен, манаш лиеш. «Марий
ушем» мер организацийым тунам Н.С.Попов вуйлатен,
Оньыжалан В.Л.Николаевым сайленыт. Марий Элын
президентше В.Кислицын лийын.
VI черетдыме Марий калык погын.
Йошкар-Ола, 2002 ий 26 апрель.
Марий калыкын Оньыжаже тунам В.Л.Николаев лийын.
Тӱҥ шотышто погын республикын тунамсе правительствыжын
политикыжлан ӱшаныдымашым ончыктен. Регион-
влак кокласе «Марий калык погын» толкынын негызше
ышталтын.
VII Марий калык погын.
Йошкар-Ола, 2004 ий 26-28 март.
«Марий калык ден мер толкынын пӱрымашышт» йодыш
йыр мутланымаш каен.
Марий Оньыжалан В.Колумб лӱмеш рӱдер-тоштерын
директоржо В.Н.Козловым сайленыт.
VIII Марий калык погын.
Йошкар-Ола, 2008 ий 16-19 апрель.
Каҥашыме тӱҥ йодыш – «Марий тӱня да граждан обществе».
Мер Каҥаш вуйлатышылан РФ Кугыжаныш Думын
депутатше Л.Н.Яковлевам сайленыт. Погынышто Марий
Элын президентше Л.Маркелов лийын.
IX Марий калык погын.
Йошкар-Ола, 2012 ий 18-21 апрель.
Марий тӱнян ончыкылыкшо могай лийшаш нерген мутланеныт.
Оньыжалан Марий Эл Кугыжаныш Погын
председательын алмаштышыже А.Н.Ивановым сайленыт.
Погынышто Марий Элым вуйлатыше Л.Маркелов
лийын.
X Марий калык погын
Йошкар-Ола, 2016 ий 14-16 апрель. Марий калыкын ончыко вияҥмыж дене кылдалтше тургыжландарыше йодыш-влакым каҥашеныт. Эн шуко еҥым «Шочмо йылме да еш» секций чумырен. Погынышто Марий Элым вуйлатыше Л.Маркелов лийын.
Марий оньыжалан Марий самырык театрын исполнительный директоржо, Россий президент В.Путинын ушанъеҥже, Марий калык конгресс вуйлатыше Э.В.Александровым сайленыт.
Хроникым «Съезды народа мари»
(1917-2004 гг.) книга негызеш С.НОСОВА ямдылен.