Йошкар-Олан ончычсо мэрже Павел Плотников петырымаште шинча гынат, шукерте огыл тудым эше ик уда пашам ыштымыжлан – черетан взяткым налмыжлан – титаканлан шотлат.
Тылеч ончыч лийше судын пунчалже дене келшышын Павел Плотниковым 10 ийлан эрык деч посна коденыт. Тудым кум гаражым да пачерым взятке шотеш налмыжлан, тыгак преприниматель пашам закондымын шуктымыжлан титакленыт.
Кызыт ончычсо мэрым взятке шотеш пел гаражым налын манын шотлен титаклат. Но Плотников тидын дене огеш келше, шкенжым титаканлан огеш шотло, каласен Idelreal порталлан тудын адвокатше.
Л.КАМАЛЕТДИНОВА