Марий Элыште тений индеш тылзе жапыште шоҥгыеҥым але инвалидым ончымо шотышто компенсационный выплатым тӱлышашлан 6000 наре граждан йодмашым пуэн. Кызыт тиде процедур палынак куштылемын, молан манаш гын Россий Пенсий фондын сайтыштыже Личный кабинетыш иктаж-кӧм ончымылан выплатым йодмо сервисым пуртымо, а лачшымак:
- пашам ыштен кертдыме гражданиным ончышо пашадыме, но пашам ыштен кертше еҥлан тылзе еда тӱлыман компенсационный выплатым палемдыме нерген;
- 18 ияш марте инвалид йочам але шочынак I группо инвалидым ончышо пашадыме, но пашам ыштен кертше еҥлан тылзе еда тӱлыман компенсационный выплатым палемдыме нерген;
- пашадыме, но пашам ыштен кертше лицан пашам ыштен кертдыме гражданиным ончаш келшымыж нерген;
- пашадыме, но пашам ыштен кертше лицан 18 ияш марте инвалид йочам але шочынак I группо инвалидым ончаш келшымыж нерген.
Ушештарена: пашадыме, но пашам ыштен кертше гражданин пашам ыштен кертдыме еҥым ончымыжлан компенсационный выплатым пырля илыдеат, ешын членжылан шотлалтдеат налын кертеш. Пашам ыштен кертдыме гражданинлан шочынак I группо инвалид деч посна I группо инвалид, 80 ийым темыше шоҥгыеҥ, эмлыше тӧнежын чарныде ончаш кӱлмым палемдыме илалше еҥ-влак шотлалтыт. Компенсационный выплатын кугытшо – тылзыште 1200 теҥге.
М.ИВАНОВА.
