Регионысо «Пенсионер-влакын партийыштым» вуйлатыше Валентина Злобина калык дене вашлийын да элышкына шыҥдараш палемдыме пенсий реформо нерген мутланен.
Ушештарена, Россий правительстве пенсий ийготым йыжыҥын-йыжыҥын нӧлталаш темлен: пӧръеҥ-шамычыным – 60 гыч 65 ий марте, ӱдырамаш-влакыным – 55 гыч 63 ий марте. Кызыт элыштына РФ Кабминын темлымыжым лончылат.
– Партийна тӱҥалтыш гычак «айдеме шӱрган» сай качестван, келге пенсий реформо верч шога. Мемнан задачына –пенсионер-влакын веле огыл, а Российысе чумыр граждан-шамычын илышыштым саемдаш полшаш. Тачысе пӱсӧ йодыш пенсий ийготым кугемдыме дене огыл, а пашам ыштен кертме ийготыш шушо айдемын сай паша верым муын кертдымыж дене кылдалтын. Калыклан сай пашадаран оҥай паша вер кӱлеш, – палемден В.Злобина.
Партийын почмо погынымашыжым иктешлыме почеш, резолюцийым лукмо. Тудын ик эн кӱлешан пунктшылан 55 деч кугурак ийготан-влаклан паша верым ситарыме шотышто закон пакетым приниматлаш темлымыжым шотлыман.
М.ИВАНОВА.
