Республикысе Эл кӧргӧ паша министерствыште безопасность службо ден банк учреждений еҥ-влакын координационный совещанийышт лийын.
Тений идалык тӱҥалтыш гыч Марий Элыште 900 мошенничестве ден банк картла гыч шолыштмашым регистрироватлыме. Еҥ-влаклан чылаже 40 миллион утла теҥге эҥгек ышталтын.
Тыгай сынан преступлений кокла гыч 20 % нарыжым веле пален налын да рашемден кертыт. Шымлымашым эртарымашын нелылыкше преступник-шамычын тораште улмышт, кыл да коммуникаций шотышто IT-технологийым кучылтмышт дене кылдалтын. Нуно шукыж годым республик деч веле огыл, Россий Федераций дечат тораште улыт. Еҥ-влак деч ондален налме оксаштымат мошенник-шамыч весын лӱмеш почмо банк карт гоч шканышт налыт.
Совещанийыште республикысе чыла гаяк финанс-кредит учреждений-влакын еҥышт лийыныт. Республиканский ведомствын вуйлатышыже-влак нуным тургыжландарыше йодыш-влак дене палдареныт да структур-влак кокласе вашкылым кузе эшеат саемдаш лийме шотышто темлымашыштым ойленыт. Мутлан, МВД пашаеҥ-влак банк учрежденийласе «зал ожидания» верлаште мошенник-шамычын банк картла гыч оксам кузе ондален налмышт, шолыштмышт нерген еҥ-влаклан аудио- да видеоролик-шамычым ончыкташ, тыгай сынан преступленийым ыштыме нерген профилактике семын увер листовко-влакым вераҥдаш темленыт.
Л.КАМАЛЕТДИНОВА
