Йошкар-Олаште «Пеледыш пайрем» регион-влак кокласе тӱвыра фестиваль тений 19 июньышто лиеш.
Тиден нерген республикысе Тӱвыра, савыктыш да калык кокласе кыл шотышто министерствын пресс-службыжо увертарен. Пеледыш пайрем – марий калыкнан ик эн йӧратыме, сылне жапыште эртаралтше йӱла пайремже. Тудым эртараш тӱҥалмылан тений 27 майыште 101 ий темын. Рӱдолаштына веле огыл, марий-влакын тӱшкан илыме Российысе моло регионыштат эртарашак тыршат. Кодшо ийын эпидемийлан кӧра тудо икмыняр вереже онлайн-йӧн дене лийын. А тений, карантин условий лушкыдеммеке, пайрем кумыл угыч ылыжын.
Одо кундемысе марий-влак тудым «Семык» семын палемдат. Тений тудо республик кӱкшытыштӧ Каракулин район Пыргынде ялыште 12 июньышто 25-ше гана эртышаш.
Семыкше тений 16-18 июньлан толеш. 16 — ышто – Сорта чӱктыш кече. Семык йӱдым мончаш олтат. 17-шыште – Изи пел кон кече – Семыкын уштен кумалме кечыже. Южо марий Сорта чӱктышым тиде кечын эртарат. 18-шыштыже – Лышташ кугарня, Семыкын модын-пайремлен эртарыме кечыже.
Татарстан кундемыште тыгак Семык 19 июньышто Актаныш район Йӱштӧ Памаш ялыште лийшаш.
Урал марий-влакын Свердловск область кӱкшытыштӧ эртаралтше пайремышт «Ага-пайрем» маналтеш. Тений тудым Ачит оласе округыш пурышо Марий Карши ялыште 5 июньышто палемдат.
Санкт-Петербург ден Ленинград областьыште илыше марий-шамычат шке йӱлаштым арален да шуэн толыт. Пеледыш пайремым нуно тений индешымше гана 13 июньышто палемдаш ямдылалтыт. Тудо Всеволжск оласе «Приютино» усадьбыште лиеш. Тушко Марий Эл гычат уна-влакым ӱжыныт.
Моло вере Пеледыш пайрем лийшаш нерген шоктен огыл. Умылаш лиеш, вет эпидемий эше пытен огыл.
С.Носова
