Шуко ий дене эскерыме паша ончыктен: Российыште августышто пашадымылык эн изи значений – 4,6 процент – марте шуын. Москваште эн изи показатель – 1,2 процент, Ингушетийыште эн кугу – 26,5 процент.
39 регионышто пашадымылыкын показательже элысе деч изи. Тыгодым эксперт-влак 2018 ий мучаш марте тиде сӱрет уда могырыш огеш вашталт маныт.
2017 ийысе кеҥеж дене таҥастарымаште 2018 ий тыгаяк жапыште 58 регионышто пашадымылыкын показательже иземын, кудытышто – вашталтын огыл, 21 регионышто – кушкын. Пашадымылык иземме шотышто Марий Элым сай велым палемдыман, тыште тудо 6,1 гыч 3,4 процент марте волен. Тыгодымак Карачаево-Черкессийыште 1,1 гыч 12,1 процент марте кушкын.
Российыште пашам ыштен кертше 76,2 млн. граждан ила, тиде чот гыч 3,5 млн. еҥже пашадымылан шотлалтеш. Пашадыме россиянинын кокла ийготшо – 35 ий. Тудо кокла шот дене 6,9 тылзе пашам кычалеш.
Чырык утла ужаш (26,4%) пашадымылан 15-25 ияш-влак шотлалтыт, 18 процент – 50 да тылеч кугурак ийготан граждан-шамыч.
М.ИВАНОВА.
