Марий Эл Республикысе верысе кучем орган-влакын палемдымышт почеш, регионыштына 317 тӱжем гектар мланде пайдалын кучылталтде кия. Тушто тӱҥ шотышто куэр ден пӱнчер кушкыт, шке жапыштыже США гыч ушкалым пукшаш кондымо, кызыт путырак осал кушкыллан шотлалтше полдыран (борщевик), тыгак шӱкшудо озаланат. Россий кучем ялозанлык пайдалан кучылташ лийме мландым арален кодаш пунчалын. Чаманен палемдыман, тиде паша кундемыштына пеш эркын шукталтеш: таче кечылан улыжат 6 тӱжем гектар мландым ялозанлык пайдалан пӧртылтымӧ.
…Но куандарыше, илыш дене тӧр ошкылшо озанлык-влакат улыт. Теве Морко районысо Кокласола – Нужа кугорнын шола велныже верланыше пасушто атыланен кушшо пӱнчӧ-влакым йыклык куклымо да изин-изин оралыме. Тидым шукерте огыл «Звениговский» СПК-н спецтехникыже ыштен. Кызыт кушкыл кошкен кия, лишыл жапыште тудым вес спецтехнике пилашӱк деч изиш шолдыран тыгыдемда – тыге сырьё писынрак шӱеш, да пасу писынрак пайдаланаш йӧршыш савырна.
Тыге Россий кучемын пунчалже шукталтеш…
М.ИВАНОВА.
М.Скобелевын фотожо.
