ТРАНСПОРТ

Палемдыме жапым «поктен шуман»

27 августышто Марий Эл вуйлатыше Александр Евстифеев сӧрымыж семынак Йошкар-Олаес Киров-Строитель-влак уремла ушнымаште корным ыштыме паша кузе кайымым ончалаш уэш миен толын.

Арня ончыч лиймыж годым тудо генеральный подрядчикын «корно картым» кӱлеш семын огыл шуктымо йодышлан тӱткышым ойырен. Тунамак Александр Евстифеев палемдыме жапым писынрак «поктен шуаш» кӱштен.

— Сентябрь мучаш марте ме кодшо ошмам пӱтынек тышке шупшыктен шуктена. Кызыт объектыште шукырак технике пашам ышташ тӱҥалын. Ончыкыжым пашашке верысе «Мостремстрой» организацийым ушаш мутланен келшыме. Тудо шкенжым сай велым ончыктен да вараш кодмым лишыл жапыште поктен шуаш полшен кертеш, — каласен «Марийскавтодор» акционер ушемын генеральный директоржо Евгений Козырев.

— Тыге ыштыме дене тыландак куштылгырак лиеш, — каласымым чынлан шотлен, палемден республик вуйлатыше.

Тыгак тудо проект-смете документацийын ямде улмыж шотышто йодышымат тарватен.

— Документ уке гын, тиде нелылыкым луктеш. Сандене тиде моткочак пӱсӧ йодыш. Палемдыме жапым пудырташ да качествым волташ огеш лий. Тидак тендан эн кугу задачыда. Подрядчик кӱлмым шижыда гын, тудым пашашкыда кокытеланыде ушыза, — каласен Марий Эл вуйлатыше.

Марий Эл Республикым вуйлатышын организаций

да аналитике виктемжын уверже-влак негызеш

Л.КАМАЛЕТДИНОВА

ямдылен.

Опубликовать в Одноклассники

Добавить комментарий