УВЕР ЙОГЫН

Пайремыште – калыкнан тӱвыраже, йӱлаже

Инвалид-влакын III всероссийский кеҥеж спартакиадыштым почмылан да петырмылан пӧлеклалтше пайрем «Марий Эл» ий полатыште эртен.

Тудо моткоч шуко еҥым ушен да калыкым чотак ӧрыктарен. Концерт программым ончен, залыште шинчыше-влак кокла гыч южышт шинчавӱдыштымат кучен кертын огытыл, тудо кумыл нӧлталтше, сеҥымашке шуаш да тыгодымак тӱрлӧ чер дене йӧсланыше-влаклан ончыко у ошкылым ышташ таратыше лийын.

Тиде мероприятийлан Республикысе калык усталык да тӱвыра да каныме паша шотышто шанче-методике рӱдер вуйлатыше Тамара Дмитриева вуйын шоген.

Паша кузерак ышталтын да тидын гоч нуно мом ончыкташ шоненыт? Нине да моло йодышлан вашмутым шкеж дене мутланымеке пален нална.

Тамара Викторовна, кеҥежым шуко артист канышыш кая, а Спартакиадын культур программыштыже нуно шукын улыт ыле…

— Чын, чылаже тӱжем наре еҥ лийын. Нунын коклаште Шкетан лӱмеш Марий национальный, Константинов лӱмеш руш академический да Марий самырык театр-влакын, тыгак «Марий Эл» кугыжаныш куштышо ансамбльын артистше-влак, Палантай лӱмеш тӱвыра да сымыктыш колледжын студентше-шамыч, тыгак барабанщик, вокал студийын, бальный куштымаш, Спорт федерацийын коллективше-влак мастарлыкым ончыктеныт.

Но тиддеч посна моло усталык группо-влакат пашам ыштеныт…

— Режиссёрын, балетмейстерын, сӱретчын пашашт нерген ойлыман. Балетмейстер семын Славик Асмаев, Ирина Шаймарданова, Андрей Дмитриев тыршеныт. Нунылан Жанна Шутылева, Анна Соколова, Максим Сильдуганов полшеныт. Режиссёр-постановщикше – Наталья Наумова, а эн тӱҥ сӱретчыже – Леон Тирацуян.  Ме чылан ик еш семын, келшен, пашам ыштенна. 

Программым чумырымаште, мутат уке, марий калыкын тӱвыра, йӱла поянлыкшым ончыкташ тыршенда…

— Туге. Кажне регионышто эртаралтше пайрем программе гоч шке калыкын историйжым, тӱвыражым ончыкташ тыршат. Меат эн ончыч вестӱрлӧ программым шоненна ыле: республикыштына илыше тӱрлӧ калыкын тӱвыражым театрализоватлыме действий гоч, «Югорно» спектакль гоч, ончыкташ палемденна. Но тиде жапым шукырак налеш, вет тазалык шотышто эмганен йӧсланыше-влак кужун шинчен огыт керт, ноят. Садлан вес композицийым ямдыленна. Калык шокшын вашлийын, чынжымак пайрем волгыдо, тӱрлӧ тӱсан улмыж дене кумылым нӧлтен, кугешнаш таратен. Икманаш, концерт программе марий куштымаш деч тӱҥалын да йоча, спортсмен-влакын куштымашышт дене мучашлалтын. 

Тӱшка калык Шернур сӱан сем почеш куштыш. Тынар артистлан сӱан вургемжым муаш неле лийын огыл?

— Юмылан тау, таче кечылан марий калыкын шондыкыштыжо сӱан вургем уло (воштылеш), сандене чылалан ситаренна. Манаш веле – кумшӱдӧ еҥым чиктен шогалташ?!

Спартакиаде жаплан районласе коллектив-влакат Йошкар-Олаште мастарлыкым ончыктеныт. Тидат участник-шамычлан поян тӱвыранам почын пуаш полшен.

— Районласе усталык коллектив-влак (Оршанке да Килемар районла деч молыжо — авт.), палемдыме график почеш, кажне кечын «Дружба» стадион воктенысе теннис корт дене да «Марий Эл» ий полат ончылно сылне муро, сем дене  калыкым куандареныт. Тидын гоч ме республикыште тӱрлӧ калыкын келшен, икте-весылан полшен илымыштым ончыкташ тыршенна. Концерт программе деч вара спартакиадын участникше-влакын йӧдмышт почеш дискотекымат эртаренна. Нунылан ала-могай неле лийын гынат, сылне сем почеш тавалтыде чытен огытыл. А тидыже мемнам веле огыл, спартакиадым ямдылыше, тудын участникше да ончаш погынышо-влакымат куандарен.   

Алевтина Байкова

 

 

Опубликовать в Одноклассники

Добавить комментарий