Марий Элын Тазалыкым аралыме министерствыжын увертарымыж почеш, 25 май эрдене республикысе инфекционный стационарла гыч паремше 4 еҥым мӧҥгӧ колтымо. Тыге, пандемий тӱҥалме жап гыч ты кече марте стационарла гыч чылаже 698 еҥым, ты шотыштак пеҥгыдемдыме коронавирусан 418 пациентым, эмлен лукмо. Тыгодымак эше 449 еҥ, ты шотыштак пеҥгыдемдыме коронавирусан 137 черле, умбакыже эмлалтеш.
ВКонтакте социальный кылысе «Коронавирус. Марий Элын оперативный штабше» сообществын 25 майысе данныйже почеш, пытартыш суткаште у корнавирус инфекций дене черланыме эше 39 у случайым регистрироватлыме, да тиде чот ынде 1518 еҥ марте шуын. Ик черле илыш гыч каен, пандемий тӱҥалме жап гыч 25 май йотке – чылаже 10 еҥ.
М.ИВАНОВА
