ЭКОЛОГИЙ

Оршанке гыч Медведево велыш…

Марий Элысе сонарзе-влакын биатлонышт тений молгунамсе семын Оршанке районысо Тошто Крешын ял воктене огыл, а Медведево районысо Песчаный посёлкысо лӱйкалыме верыште эртен.

Но тидыже тушто участвоватлаш шонышо-влакын кумылыштым нимынярат волтен огыл. У вер — у шижмаш. Республикысе Сонарзе да пийым кучышо-влакын ушемыштым вуйлатыше Григорий Тихоновын палемдымыж почеш, у верыште таҥасымашлан ямдылыме трассыжат куштылгырак лийын, тушто курыкан вер шагалрак. А вет, сонарзе-влак ечыш шогалын куржталыт гынат, условий почеш тоя деч посна, вачыште пычал гына лийшаш. Нуно кок гана 2,3 километран кужытым эртат да лӱйкалыме рубежыште кажне участник 3 мишеньыш кум гана логалшаш улмаш.

Тений командыжат утларак погынен — 32 лийын. Эсогыл Татарстан, Чуваш, Угарман, Киров кундемла гыч толыныт. Команде-влак коклаште сеҥышыш Киров область гыч «КГООиР1» лектын. Кокымшо ты кундем гычак «КГООиР2» команде лийын. А кумшо вер Марий нефтеперегонный заводын командыжлан логалын.  

Тидын дене пырля жюри посна участник-влакымат палемден. Мутлан, «Икымше этапыште эн сай куржшо» Оршанкысе нефтеперегонный заводын командыж гыч Вениамин Войков лийын. «Эн сайын лӱйкалыше» лӱмым Киров область гыч Майя Рзаева сеҥен налын. Ӱдырамаш куд мишень гыч визытышкыже логалын. «Эн кугу ийготан участник» семын Марий сонарзе да пийым кучышо-влакын организацийыштын командыж гыч 72 ияш Иван Москвин да «Эн самырык участник» семын Параньга районысо команде гыч Кирилл Колесников ойыртемалтыныт да палемдалтыныт. Сеҥыше-влаклан кубокым, грамот ден шарнымашан пӧлекым кучыктеныт.

С.НОСОВА

И.Головенкинан фотожо

Опубликовать в Одноклассники

Добавить комментарий