ТАЗАЛЫК

Опытан врач-влак эмлат

29 мартыште Йошкар-Оласе больницын инфекционный отделенийышкыже коронавирус дене черланыше кок ӱдырамашым эмлаш пыштыме.

– Пациент-влакым боксироватлыме палатылашке вераҥдыме. Нуным лӱмын ямдылыме кугу опытан врач-шамыч эмлат, – рашемда Марий Элын тазалыкым аралыме министрже Марина Панькова. – Рӱдоласе больницын инфекционный корпусшым тичмашнек у коронавирус инфекций дене черланыше да черланен кертше-влаклан ямдылыме, кӱлешан оборудований дене шыҥдарыме. Йошкар-Ола кумдыкышто илыше-влакым инфекциян, коронавирусан огыл чер деч Медведево да Оршанке районласе рӱдӧ больницылаште эмлаш тӱҥалыт.

Министрын алмаштышыже Татьяна Бастракован мутшо почеш, коронавирус дене черланыше-влак шкеныштым удан огыл шижыт: интоксикацийышт утыжым огеш палдырне, капкыл температурышт субфебрильный (37,1 – 38 градус), пневмоний але бронихит авалтымым пеҥгыдемдыме огыл, кӱшыл шӱлымӧ органыштышт фарингит вияҥмылан гына кокырат. Больницыште тыгак ОРВИ дене черланыме палан ик пациент кия, тудлан диагнозым эше шындыме огыл.

М.ИВАНОВА

Опубликовать в Одноклассники

Добавить комментарий