Марий Элын Торгово-промышленный палатыж пеленсе Чодыра комплекс шотышто комитетыште чодыра продукцийым йот эллаш ужалыме йодышым каҥашеныт.
Комитет вуйлатыше Расих Мингазовын ойлымыж почеш, чодыра продукцийым ыштыме пашаште исполнительный кучем денат, муниципалитет вуйлатыше-влак денат сай кыл лийшаш. Чодыра отрасль дене кылдалтше изи да кокла предприниматетльствым вияндаш тыршыман. «Тӱнямбал коопераций да экспорт» национальный программым шуктымо кышкарыште мемнан республикын сатужым йот эллаште ужалыме пашам саемден колтыман. Тачысе кечылан Марий Эл гыч лесопромышленный комплексын сатужо тӱнямбал рынкыш Озаҥ да Прибалтике, тыгак ятыр моло посредник гоч колталтеш. Сандене марий производитль-шамычлан йот элласе партнер-шамыч дене вияш кылым ыштыман. Шукерте огыл тидын шотыштак Торгово-промышленный палатына «Русский дом в Италии» тӱнямбал рӱдерын представительже Евгений Строганов дене онлайн-конференцийым эртарен. Мутланымаш мемнан продукцийым Балкан полуостровыш колтен кертме йыр каен. Тудо ты шотышто полшаш сорен. А тидлан марий производитель-влак эн ончыч шке продукцийыштын образецше-влакым ямдылышаш улыт.
С.НОСОВА.
