Куштылго атлетике дене Российын чемпионкыжо (2013, 2015 ийла) Людмила Лебедева 2018 ийыште куштылго атлетике дене (кросс) всероссийский федерацийын иктешлымыж деч вара кеҥеж турышто, эн шуко очком (50) поген, икымше верыш лектын.
ВФЛА пресс-службыжын палемдымыж почеш, кокымшо – Анна Белокобыльская (38), кумшо верыште – Светлана Аплачкина (36).
Землячкынан зачетышкыжо мартыште Кисловодскышто РФ кубок верч таҥасымыжат, апрельыште Жуковскийыште кросс дене Российын чемпионатыштыже выступатлымыжат, шукерте огыл, 20-21 октябрьыште Оренбургышто финалыште стартыш лекмыжат пуреныт. Палемдыман, Оренбургышто эртыше кеҥеж турын финалыштыже Людмила куд километр кужытышто ший медальым сеҥен налын. rusathletics.info-н палемдымыж почеш, ты турышто икымше верым налшылан 50 тӱжем, кокымшылан 30 тӱжем, кумшо верым налшылан 20 тӱжем теҥгем пуат.
Е.Эшкинина.
