Оласе «Марий кумалтыш» вияҥаш шона
УВЕР ЙОГЫН

Оласе «Марий кумалтыш» вияҥаш шона

Марий юмыйӱла ушемын Йошкар-Оласе «Марий кумалтыш» общиныже тений 26 январьыште регистрацийым эртен. Тудым вуйлаташ Шернур районын шочшыжо, юмыйӱлалан мелын шогышо В.Смирновлан ӱшаныме, а Тӱҥ онаеҥлан Ю.Тушнурцевым палемдыме. Эртыше шочмын учредитель-влакын черетан погынымаштышт лишыл жапысе паша планым каҥашыме, общиным вияҥдыме нерген мутланыме.

Йошкар-Ола да Медведево районышто илыше марий-влак такше 2000-ше ийла тӱҥалтыш гычак Тумерыш кумалаш лектыт. А пытартыш ийлаште Пеледыш пайрем кечын Пӱнчерысе Тумер аланыште Агавайрем кумалтышым эртарат. Кокымшышкыжо марий-влакын тӱшкан илыме регионла гычат ушнат.

Общинын пӧлемже (304-ше) республикысе Мер-политике рӱдерыште верланен. Погынымаште йоҥгалтше кажне темлымашым илышыш пурташ гын, сай ыле. Мутлан, кумалтышым эртарышаш арверым шукемдаш, кажне марий кечышот ден пайрем годым тӱшкан погынен палемдаш, общине лӱм дене мероприятийлаште мутым ойлаш, общиныш Медведево районышто илыше марий-влакымат ушаш кӱлмӧ нерген ойлымо.

. Йошкар-Олаште рушарня кумалтышым эртараш тӱҥалмат калыкын кумалтыш кумылжым шукташ полша шонена. Вет тыгай кумалтыш латшым ий ончычак тӱҥалтышым налын, да тушко 50 наре коштеш ыле. Кумалтыш деч вара онаеҥ марий йӱла дене кылдалтше умылтарымаш пашам ыштен. Вес оҥай темлымаш краевед И.Степанова деч лийын. Тудо пытартыш жапыште марий тӱр ден тамгам, юмо-влакым шымлымыже, марий тамган скандинав-влакын тамгашт дене келшен толмышт нерген палдарен.

Шошо пагытыште общинын погынжым эртараш темлыме. Ты пашаш ушнаш, полышым пуаш кумылан еҥ-влак вуйлатыше Василий Федорович Смирнов деке йыҥгыртен (89371105287) кертыт.  

С.Пехметова.

Снимкыште: И.Степанова (марий тамга нерген каласкала) ден общиным вуйлатыше В.Смирнов.

М.Скобелевын фотожо.

Опубликовать в Одноклассники