УВЕР ЙОГЫН

Оксам шеледат, судьям пеҥгыдемдат

Марий Эл Кугыжаныш Погын депутат-влак 27 июльышто эртышаш 28-ше сессийыштышт 17 йодышым ончаш тӱҥалыт. Нуно Марий Эл Республикын бюджетше нерген законыш вашталтышым пуртат. Тидлан амалжат лектын: республик федеральный бюджет гыч субсидий семын кок миллиард наре теҥгем налын. Депутат-влак тудым шеледат. Ты окса гыч утларак ужашыже муниципальный образований-влакын кредитыштым да дотацийым петыраш колтымо лиеш.

Депутат-влак тыгак судья-шамычым пеҥгыдемдат, икмыняр законодательный акт ден законопроектыш вашталтышым пуртат. Мутлан, Марий Элын ончычсо тӱҥ федеральный инспекторжо В.Егоровын республикысе Конституционный судын судьяже лияш кугу ӱшанже уло. Парламентын сессийыштыже ты йодышымат каҥашаш тӱҥалыт.

В.Егоров 62 ияш. Волжский районышто шочын. 2000 гыч 2003 ий марте республикыште икымше тӱҥ федеральный инспектор лийын. Варарак Марий кугыжаныш педагогический институтым вуйлатен, вузын МарГУ дене ушнымекыже, Казаньысе  Экономике, управлений да право институтын юридический факультетшын деканжылан ыштен.  В.Егоров СССР КГБ орган гыч лекше, республикыште политический репрессийыш логалше да раскулачиватлыме-влакым реабилитироватлыме шотышто пашам вуйлатен.

В.Егоровым Марий Элын ончычсо вуйлатышыже Л.Маркелов дене пашам ыштен икойыш шуын кертдыме чиновник-влак радамыш пуртат. Республик вуйлатышым сайлыме але шогалтыме кампанийыште тудын кандидатурыжым Л.Маркеловым алмаштен кертше семын чӱчкыдын ужыныт. Шкенжым республикысе политикыште кумдан ончыкташ кумылан лийын огыл.

А.АНДРЕЕВ.

Опубликовать в Одноклассники

Добавить комментарий