СОЦИАЛ ИЛЫШ

Ны йӱаш, ны чайым шолташ…

Роспотребнадзор увертара

Ны йӱаш, ны чайым шолташ…

Марий Эл Республикысе Роспотребнадзор виктем 19 май гыч 1 июнь марте рӱдӧ системе гоч ситарыме йӱшаш вӱдын мониторингшым эртарен да регионысо южо кундемыште тудын санитарно-химический показатель шотышто гигиенический нормативлан келшен толдымыжым рашемден.

Звенигово районысо Трубный посёлкышто йӱшаш вӱдыштӧ кӱртньӧ нормо деч шуко, а Шолангуш ялыште – кӱртньӧ, пеҥгыдылык, кукшо йошкын да сульфат. Волжский районысо Приволжский посёлкышто да Пӧртанур ялыште йӱшаш вӱд утыжденат пеҥгыде, тушто эше кӱртньӧ нормо деч шуко. Юрино районысо Йӱркына посёлкышто йӱшаш вӱдыштӧ кӱртньӧ шуко, тӱс ден яндарлыкат нормылан келшен огыт тол.

Юрино районысо Александрово ялыште рӱдӧ огыл системе гоч ситарыме йӱшаш вӱдыштӧ микробиологический показатель дене келшен толдымым мумо. Волжский районысо Шийсола да Элнеттӱр яллаштат тыгаяк сӱретым рашемдыме. Юрино районысо Растегаиха ялыште вӱдын яндарлыкше ден тӱсшӧ нормылан келшен огыт тол.

М.ИВАНОВА.

Опубликовать в Одноклассники

Добавить комментарий