СОЦИАЛ ИЛЫШ

Кугу паша кугу вийым йодеш

Марий Элыште инвалид йоча-влакын социальный реабилитацийыштлан да абилитацийыштлан кугу тӱткыш ойыралтеш.

Социальный вияҥмаш министр Ольга Фёдорован мутшо почеш, республикыштына инвалид-влакын, ты шотыштак инвалид йоча-шамычын комплексный реабилитацийыштлан але абилитацийыштлан 2018-2020 ий-влаклан мероприятий планым ыштыме. 2019 ий гыч тудын пашам ыштыме системыже талук еда аклалташ тӱҥалеш.  

2018 ий 1 октябрьлан регионыштына 2678 инвалид йоча шотлалтеш.

Тазалыкым аралыме министерстве инвалид йоча-шамычлан медицине полышым да реабилитацийым амбулаторий условийыште, стационарлаште йыжыҥын-йыжыҥын эртарыме системым ыштен.

Туныктымо пашам Образований да науко министерстве инвалид йочан психофизический вияҥмашыжым да ача-аважын кумылжым шотыш налын виктара. 2018-2019 тунемме ийлаште чылаже 1290 икшыве шинчымашым пога.

Инвалид йоча-шамычын социальный реабилитацийыштлан але абилитацийыштлан Социальный вияҥмаш министерстве мутым куча. Тиде пашам системын калыкым социально обслуживатлыме комплексный рӱдерже, тазалыкыште экшык улман йоча-влаклан палемдалтше реабилитаций рӱдерже да йоча интернат-школжо-шамыч шуктат. Комплексный рӱдер-влакын учётыштышт таче кечылан инвалид йочан 1798 еш шога, тушто 1871 икшыве кушкеш.

Социальный вияҥмаш министр О.Фёдорова инвалид йоча-влак дене кӱлынак пашам ыштыме шотышто таче кечылан эше шуко нелылыкым, чаракым да ситыдымашым ужеш, сандене нуным шотыш кондашлан раш корным палемдаш темла. Но реабилитацийын да абилитацийын тӱрлӧ направленийышт исполнительный кучем орган да тӱрлӧ ведомство организаций-влак деч тиде пашам иквереш ышташ йодеш.

М.ИВАНОВА.

 

 

 

 

 

Опубликовать в Одноклассники

Добавить комментарий