27 майыште Марий самырык театрын артистше Артём Иркабаев «Торешватесолаште – томаша» спектакль дене бенефисшым эртара.
Пошкырт кундем Мишкан районысо Тымбай ялеш шочын-кушшо рвезе И.С.Палантай лӱмеш тӱвыра да сымыктыш колледжыште тунеммыж годымак театр коллективыш ушнен да опытан артист-влак дене пырля сценыште рольым модын.
А таче кечылан Артёмым чыла гаяк спектакльыште ужаш лиеш. Образыш келгын пурен моштымыжо да авторын каласышаш шомакшым сцене действий дене почын пуымыжо спектакльым ик шӱлыш дене ончаш, чоным йӱлалтен тавалтен колтымыжо марий улмына дене кугешнаш таратат. А тидыже, мутат уке, изинекак калыкнан тӱвыражлан, йӱлажлан шӱмаҥмыж нерген ойла.
А.Иркабаевын театрыш толмо корныжо могайрак лийын? Бенефислан лачшымак молан тиде спектакльым ойырен налын? Нине да моло нерген шкеж дене мутланышна.
– Артём, изинекак усталык шӱлышан кушмет артист лияш таратен, очыни?
– Чын, изинекак Пӱнчер ялын мурышо да куштышо ансамбльышкыже коштынам. Тиде коллектив калык лӱмым сулен налын, кызыт «Юго» лӱмым нумалеш. Тудым Алексей Ахмазович Иванов вуйлата. Адакшым ялысе клубыштына театр мастарлыклан туныктышо кружокыш уло кумылын коштынам, ятыр гана тӱшка сценыште модаш логалын. Шарнем, ик телым иктаж куд имне дене пошкудо ялыш концерт дене миенна. Кажне имне терыш костюм-влакым, декорацийым оптенна, шкеат туштак шинченна. Спектакль але концерт пытымеке, йӱштым, лумым, пораным ончыде, мурен-мурен мӧҥгӧ кудалынна. Тидын нерген моткоч кужун каласкален кертам, тудо жап ӱмырешлан шарнымашеш кодеш, тыге калыкнан тӱвыражлан шӱмаҥынам. Садланак кӧра 9-ше класс деч вара И.С.Палантай лӱмеш тӱвыра да сымыктыш колледжыш тунемаш пураш толынам ыле…
… Умбакыже материалым газетыште лудаш темлена…
