25 мартыште Йошкар-Олаште мӱкшызӧ-влакын черетан конференцийышт лиеш.
Тидын деч ончыч республикысе чыла районышто погынымаш-влак эртеныт. Тудым республикысе мӱкш ончышо-влак ушемым вуйлатыше В.Южаков эртарен. Ик вере тушко толшо еҥ-влак шагалын лийыныт гын, вес вере мӱкшызє-шамыч утларак чулымлыкым ончыктеныт, тургыжландарыше йодышлам каҥашымашке чолган ушненыт. Мутлан, Марий Турек районышто погынымаш поснак сайын эртен.
Йошкар-Олаште эртышаш погынымаште кодшо ийысе пашам иктешлат, ончыкылык планым пеҥгыдемдат. Ӱмашсе пашам ончалаш гын, шагал огыл ыштыме. Районласе ончыл пчеловод-влакын опытыштым шымлаш миен коштмо, мўкшын черже-влак ваштареш кузе кучедалаш кӱлмӧ нерген каҥашыме, республикысе мӱкш ончышо-влакын «Марий Отар» ушемышт пелен ыштыме «Шӧртньӧ нектар» кооперативын пашажым уэмден колтымо. Тудым вуйлаташ чолга предприниматель П.Свининлан ӱшаныме. Пашам ворандарен колтышашлан кугажаныш грантым пуымо. Тиде окса дене Павел Иванович мӱйым тыгыде атылашке темкалыше линийлан оборудованийым налын да шочмо Кужэҥер районысо Кульшит ялыштыже цехым почын. Тудо икымше сатум тиде тылзе мучаште лукшаш. Продукцийым «Шӧртньӧ нектар» ден «Марий Отар» бренд-влак негызеш лукташ тӱҥалыт. Тудым республикысе кочкыш сатум ужалыше чыла кевытлашке колташ палемдыме.
В. Смоленцев.
Авторын фотожо.
