Кугече арняште республикысе Марий Тӱвыра рӱдер «Кугече лӱҥгалтыш» конкурс гоч йӱлам эн сайын шуктышо ялым ойыра.
Кугече марий калыкын веле огыл ик эн волгыдо пайремжылан шотлалтеш. Тудым эртарыме радам кажне кундемыште шкешотан, но пайрем годым лӱҥгалтыме йӱла чыла вере гаяк эртаралтеш. Марий тӱвыра рӱдер тидым шотыш налын да калыкын йодмыжым шуктен, ты конкурсым увертарен.
Тений «Кугече лӱҥгалтыш» конкурсыш республикысе шым район гыч кандаш тӱвыра тӧнеж ушненыт. Марий тӱвыра рӱдерын пашаеҥже-влакын лишыл кечылаште конкурсын условийжым шуктымым аклаш верлашке лектыт, пайрем йӱлам эртарыме радамым, вер-шӧрым тӱзатымым шотыш налыт. Кушто, кунам нуно лийыт, палдарена:
16 апрель — Марий Турек район Марий Купто ял;
17 апрель — Волжск район Руш Шайра ялыште пайрем 11 шагатлан, Ӱлыл Азъялыште 14 шагатлан тӱҥалеш;
18 апрель — Кужэҥер район Токтайбеляк селаште 11 шагатлан, У Торъял район Кузнеч ялыште 14 шагатлан почылтеш;
19 апрель — Советский район Кукмарий ялыште пайрем 14 шагатлан тӱҥалеш;
20 апрель — Звенигово район Какшамарий ял калык пайремым 14 шагатлан тарвата.
21 апрель — Параньга район Усола ялыште пайрем 14 шагатлан почылтеш.
22 апрельыште «Кугече лӱҥгалтыш» конкурс Йошкар-Оласе Рӱдӧ каныме паркыште иктешлалтеш. Пайрем 13 шагатлан тӱҥалеш.
С.Носова.
