Россий Федерацийын Следствий комитетшын Марий Элысе Следствий управленийже Марий Турек районысо Косолоп школ-интернатын воспитанникше-шамыч дене шукертсек пеҥгыде кылым куча. РФ Следствий комитетын увертарыме акцийже дене келшышын, ты школ-интернатысе йоча-влак «Мый ветеранлан возем» темылан открыткым ямдыленыт.
Нуно шке пашаштым сылнын сӧрастареныт да ветеран-влаклан Кугу Сеҥымашлан тауштен, нунылан тазалыкым да кужу пиалан илышым тыланен сереныт, палдара управленийын пресс-службыжо.
Нине открыткым, тыгак шке оксашт дене налме индивидуальный аралалтме средства-влакым Марий Элысе Следствий управленийын пашаеҥже-влак шефствыште улшо Кокшайскысе Илалше да инвалид-влаклан интернат-пӧртыштӧ илыше ветеран ден тылыште тыршыше-влаклан кучыктеныт.
Интернат-пӧртын директоржо полышым пуымылан следователь-влаклан тауштен, а эпидемий сӱрет сай велыш вашталтмеке, икшыве-шамыч дене кылым кучаш тӱҥалына манын каласен.
Л.КАМАЛЕТДИНОВА
