УВЕР ЙОГЫН

Муро да почеламут дене сеҥеныт

Ийготыш шудымо-влаклан «Журавушка» социально-реабилитационный рӱдерын воспитанникше-шамыч «Шанс» VI Тӱнямбал фестиваль-конкурсышто мастарлыкыштым тергеныт. Тиде конкурс Йошкар-Оласе «Оваций» усталык ушемын тӱҥалтышыже да Йошкар-Ола администрацийын культур виктемжын полшымыж дене эртен.

«Вокал» номинацийыште ака-шӱжар-влак Юлия, София, Ульяна Ивановамыт да Виктория Трофимова участвоватленыт. Викториян «Снежинка» мурыштыжо интонацийым яндарын шынден моштымыжо жюрин еҥже ден залыште шинчыше-влакын кумылыштым налын, да ӱдырлан 2-шо степенян лауреат лӱмым пуымо. Ивановамытын триошт «Чудо придёт» муро дене 3-шо степенян лауреат лийын. Ӱдыр-влак музыкальный улмышт да сценыште образым чоҥен моштымышт дене ойыртемалтыныт.  Юлия Иванова эше Р.Гуцалюкын «Дом, где любовь и красота» мурыжым мурен. Репертуарын нелылыкшым, йӱкын моторлыкшым да вийжым шотыш налын, жюрин еҥже-влак ӱдырлан 1-степенян дипломант лӱмым пуэныт.

  «Сылнымут шомак» номинацийыште Камилла Баранова Н.Добронравовын Ленинградын блокадыж нерген да Кугу Сеҥымашлан 75 ий теммылан пӧлеклалтше «Хлеб» почеламутшым сылнын лудын да 1-ше степенян дипломант лийын.

М.ИВАНОВА

Опубликовать в Одноклассники

Добавить комментарий