Параньга районысо Матародо селаште илыше Сергей Кологривовлан окса полыш кӱлеш!
Рвезылан Челябинск олаште верланыше «Сакура» медицине рӱдерыште кызытак реабилитацийым эртыман, но кок курсын акше – 189900 теҥге.
Аваже Элина Кологривован мутшо почеш, Серёжа 2014 ий 10 августышто 34 арняш шочын. Икшыве пеш начар лийын, сандене тудым Перинатальный рӱдер гыч мӧҥгӧ огыл колтеныт, а Йошкар-Оласе йоча больницыш жап деч ончыч шочшо икшыве-влакым ончымо отделенийыш наҥгаеныт.
Эмлымвер гыч лекмеке, реабилитаций да эмлалтме курс-влак тӱҥалыныт. А 1,5 ияш лиймекше, рвезылан шучко диагнозым шынденыт – ДЦП, спастический диплегий. 2 ияшыж годым инвалидностьым пуэныт.
Изи Сергуш 4 ияш веле гынат, тымарте моткоч шуко реабилитаций ден тӱрлӧ шотан эмлалтме курсым эртен, сандене тазалыкыштыжат сай вашталтыш уло. Рвезе коштеш, но пеш йӧсын: чӱчкыдын камвозеш, бордюр гоч нелын вонча, тошкалтыш дене пыкше кӱзен-вола.
Пытартыш жапыште икшыве йолжо корштымылан да писын нойымылан вуйым шиеш. Туге гынат, моло йочам ончен, тичмаш илыш верч кучедалеш.
— Таче кечылан мыланна реабилитацийын кок курсшым эрташ кӱлеш. Но палемдыме счёт – 189 тӱжем теҥге – пеш кугу, тынар оксам шке вийна дене нигузеат поген огына керт, сандене полышым калык деч йодына. Тачысе кече – мемнан тушманна. Серёжа писын кушкеш, а чер дене локтылалтше чогашыл лу дене пырля вияҥын огеш керт. Чыла ӱшан – специализироватлыме рӱдерлан гына, вет тушто кажне эмлалтме деч вара ме ик ошкыллан таза ончыкылыкыш тошкалына. Эргым моло йоча гаяк таза лийнеже. Полшыза, пожалуйста, — манеш Э.Кологривова.
Сергей Кологривов дене кылдалтше чыла материал тыште: https://bfsj.ru/campaign/kologrivov-seryozha/
Полшаш шонымо рвезе да фонд нерген моло уверат уло. Тудым «Сокровенное желание» поро кумыл фонд йодмыда почеш пуаш эре ямде.
М.ИВАНОВА
