ТАЗАЛЫК

Медицине: Таза еҥ шукак огыл

2017 ийыште Марий Элыште диспансеризацийым 103194 кугыеҥ эртышаш улмаш. 2018 ий тӱҥалтышлан медицине тӧнежын пуымо тиде услуго дене 89827 еҥ (план дечын 87%) пайдаланен. 

19263 еҥым кокымшо этапыш колтымо. Тудын кышкарыштыже лабораторный да инструментальный йӧн дене ешартыш шымлымаш, врач-специалист-шамычын консультацийышт эртаралтыт.

Врач-влакын тергымышт, шымлымышт да иктешлымышт почеш, диспансеризацийым эртыше-влак тазалык шот дене кум тӱшкалан шелалтыныт:

1-ше тӱшка (нине граждан-влакын инфекциян огыл хронический черышт, тыгак нунын дене черланаш амалышт уке) – 18,6 процент;

2-шо тӱшка (нине граждан-влакын инфекциян огыл хронический черышт уке, но нунын дене черланен кертме лӱдыкшышт уло) – 20,5 процент;

3-шо тӱшка – (нине граждан-влакын инфекциян огыл хронический черышт уло, сандене диспансер велым эскералташ кӱлеш) – 61 процент.

Диспансеризаций годым инфекциян огыл тӱрлӧ чер дене черланыме 58805 случайым рашемдыме. Нунын коклаште поснак кугу давленийым, вӱрыштӧ глюкозын нормо деч шуко улмыжым, уто нелытым, тамакым шупшмым, аракам йӱмым, наркотик дене пайдаланымым, шагал тарванылмым, шотдымын кочмым, шӱм-вӱргорно системын пужлымыжым да наследственностьын «йолажым» палемдыме.

Чер кокла гыч икымше верым эндокринный, кочкышым шулыктарыше системе-влакын черышт налеш – 30 процент, кокымшышто – вӱр коштмо системын черже-влак (17,3 процент; тышечын 74,8 процентше кугу давлений дене кылдалтын), кумшышто – мочеполовой системын черже-влак (16,8 процент).

Осал пуалше дене орланыше эше 210 еҥым учётыш шогалтыме, нунын кокла гыч кумшо ужашыже – черын 1-2 йыжыҥыштыже.

2017 ийыште эртарыме диспансеризаций жапыште чылаже угыч черланыме 13912 случайым регистрироватлыме. Тидыже диспансеризацийын пайдажым эше ик гана пеҥгыдемда. 

2018 ийыште диспансеризацийым регионышто илыше 106079 еҥ эртышаш.

М.ИВАНОВА.

 

Опубликовать в Одноклассники

Добавить комментарий